काठमाडौं । प्रतिपक्ष दल राष्ट्रिय स्वतन्त्र पार्टी (रास्वपा)ले प्रतिपक्षीले संसद्मा राखेको विषयको सुनुवाइ नभए सदन र सडक अवरुद्ध गर्ने चेतावनी दिएको छ । बिहीबार प्रतिनिधिसभा बैठकको आकस्मिक समयमा रास्वपाका सांसद विराजभक्त श्रेष्ठले सरकार संसद्प्रति जवाफदेही नभएको बताए ।

बालकुमारी घटनाको प्रतिवेदन अध्ययन गरेर आवश्यक कारबाही अगाडि बढाउनुपर्नेमा सरकारले अहिलेसम्म त्यसो नगरेको उनले उल्लेख गरे । उनले प्रधानमन्त्री पुष्पकमल दाहाल ‘प्रचण्ड’लाई ‘प्रतिवेदनको अध्ययन कहाँ पुग्यो ?’ भनी प्रश्न समेत गरे ।

उनले प्रतिपक्षको कुरा नसुनिएमा आन्दोलन गर्ने चेतावनी दिए । “प्रधानमन्त्रीले प्रतिवेदन पढ्नुहुन्छ र केही कारबाही गर्नुहुन्छ भन्ने अपेक्षा गरेको अहिलेसम्म केही पनि भएको छैन । त्यो प्रतिवेदनको उहाँको अध्ययन कहाँ पुग्यो ? तीन दिन भइसक्यो,” उनले भने, “त्यो प्रतिवेदन के भयो ? यो दण्डहीनताको पराकाष्ठा हो । संसद्प्रति सरकार जवाफदेही हुँदैन भनेदेखि मुलुकले कस्तो नेतृत्व पाइरहेको छ ? कति लामो प्रतिवेदन हो ? पढ्न गाह्रो भएको भए हामीलाई ल्याइदिनु, हामी वाचन गरेर सुनाइदिन्छौँ ।”

उनले थपे, “सरकारलाई चेतावनी पनि दिन चाहन्छु– यसरी प्रतिपक्षलाई नसुन्दै जाने हो भने संसद् अवरुद्ध पनि हुन्छ । आन्दोलन पनि हुन्छ । तर, सरकारले भोलि हामीलाई प्रतिपक्षले सदन चल्न दिएन भनेर दोष लाउन पाउँदैन । जनताको कुरा हामीले राख्दा सरकारले अनदेखा गर्छ भने संसद् मात्रै होइन, सडक पनि अवरुद्ध हुन्छ ।”

मिटरब्याजपीडितले न्याय नपाएर आन्दोलनरत रहेको उनले बताए । सरकारले उनीहरूलाई न्याय दिन नसकेको भन्दै सांसद श्रेष्ठले त्यसतर्फ ध्यानाकर्षण पनि गराए । न्युज एजेन्सी नेपाल