काठमाडौं । यूईएफए च्याम्पियन लिग प्रि–क्वार्टरफाइनलको पहिलो लेगमा स्पेनिस क्लब बार्सिलोना नापोलीसँग १–१ को बराबरीमा रोकिएको छ । बुधबार राति नापोलीको मैदान डिएगो अर्मान्डो म्याराडोना रंगशालामा जाभीको टोली १–० को अग्रता जोगाउन नसक्दा रोकिएको हो ।

पहिलो हाफ गोलरहित बराबरीमा सकिएको थियो । ६०औँ मिनेटमा रोबर्ट लेवान्डोवस्कीले गोल गर्दै पाहुना टिमलाई अग्रतामा राखेका थिए । बार्सिलोनाको अग्रता लामो समय टिक्न सकेन । ७५औँ मिनेटमा भिक्टर ओसिम्हेनले गोल गर्दै नापोलीलाई खेलमा फर्काएका थिए ।

यी दुई टिमबीचको दोस्रो लेग मार्च १३ मा बार्सिलोनाको घरेलु मैदानमा हुनेछ ।

पोर्टो विजयी
बुधबार राति नै भएको अर्को खेलमा पोर्चुगिच क्लब पोर्टोले इंग्लिस क्लब आर्सनलविरुद्ध १–० को जित निकाल्यो । घरेलु मैदान स्टाडियो डो ड्रागोओमा पोर्टोलाई जित दिलाउन वेन्डरसन गालेनोले निर्णायक गोल गरे ।

गालेनोले खेलको इन्ज्युरी समयमा गोल गरेपछि पोर्टोले ४९ हजार १११ घरेलु समर्थकमाझ साँघुरो जित निश्चित गर्‍यो ।

यी दुई टिमबीचको दोस्रो लेग मार्च १३ मा आर्सनलको घरेलु मैदानमा हुनेछ ।