काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले गएको राष्ट्रियसभा सदस्य निर्वाचनमा जितका निम्ति खुला प्रयास गरिएको बताएका छन् । ललितपुरको च्यासलस्थित पार्टी मुख्यालयमा मंगलबार बसेको केन्द्रीय कमिटीको बैठकमा उनले आफूहरूले कसैलाई बेइमान नगरेको उल्लेख गरे ।

सो निर्वाचनमा एमाले एक्लैले जित्न कहीँ पनि मतभार पुग्ने अवस्था नरहेको उनले सुनाए । जितका निम्ति राष्ट्रिय प्रजातन्त्र पार्टी (राप्रपा)सित तालमेल गरिएको उनले स्पष्ट पारे ।

“कहीँ पनि जित्नका लागि मतभार पुग्दैनथ्यो । एक ठाउँमा जित्यौँ । त्यस जितका लागि खुला प्रयास गर्‍यौँ,” उनले भने, “राप्रपा र हामीबीच सहमति भएको थियो ।”

• एमाले गिडगिडाइरहेको हल्ला फैलाइयो, ललिपप देखाइयो : ओली

राष्ट्रियसभा निर्वाचनअन्तर्गत कोसी प्रदेशमा एमाले र राप्रपाले एकार्काका उमेदवारलाई सघाउने सहमति गरेका थिए । राप्रपाको सहयोगमा एमाले उमेदवार निर्वाचित भए । राप्रपाका उमेदवार हारेका थिए ।

त्यसपछि राप्रपाका प्रवक्ता मोहन श्रेष्ठले एमालेलाई लाञ्छित गरेको ओलीले बैठकमा बताए । “राप्रपाको प्रवक्ता भन्ने मान्छेले एमालेले धोका दियो भन्ने लाञ्छित गरेको देखियो,” उनले भने, “त्यो भोट आकाशबाट आयो ?”

राप्रपाका प्रवक्तामा एमालेविरोधी भावना रहेको ओलीको बुझाइ छ । “राप्रपाका प्रवक्ता भन्नेमा एमालेविरोधी भावना रहेछ । एकाध भोट बिग्रिए होलान्, राप्रपाको बिग्रियो होला,” उनले भने, “हामीले बेइमान गरेका होइनौँ ।”