काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले गएको राष्ट्रियसभा सदस्य निर्वाचनताका गलत हल्ला फैलाइएको बताएका छन् । ललितपुरको च्यासलस्थित पार्टी मुख्यालयमा मंगलबार बसेको केन्द्रीय कमिटीको बैठकमा उनले एमालेका बारे भ्रम छरिएको जिकिर गरे ।

“त्यसक्रम (राष्ट्रियसभा सदस्य निर्वाचन)मा हामीलाई बदनाम गर्न केही सिट मागिरहेका छौँ, गिडगिडाइरहेको छ भन्ने गलत हल्ला भएको थियो,” उनले भने, “बदनाम गर्ने कोसिस गरियो ।”

प्रधानमन्त्री पुष्पकमल दाहाल ‘प्रचण्ड’ले ‘मिलेर जाऔँ’ भन्ने प्रस्ताव गरेको उनले सुनाए । “शेरबहादुरजीसहितको छलफलपछि राष्ट्रियसभामा एकलौटी गर्न चाहन्नौँ भन्नुभएको थियो,” अध्यक्ष ओलीले भने, “हामीले अस्वीकार गर्नुपर्ने कुरा थिएन ।”

त्यति बेला एमालेलाई ‘ललिपप’ देखाइएको उनको बुझाइ छ । “शान्ति प्रक्रिया टुंग्याऔँ, संक्रमणकालीन कुरा टुंग्याऔँ । चुनाव माघ ११ मा हो, आजै टुंग्याइहालौँ । हामीलाई चकलेट, ललिपप देखाएपछि मिल्छौँ भन्ने धूर्त थियो,” उनले भने ।

एमालेले शान्ति प्रक्रियाको बाँकी काम अविलम्ब टुंग्याउन चाहेको उनले उल्लेख गरे । पीडितमैत्री ढंगले समस्याको समाधान गर्नुपर्नेमा उनले जोड दिए ।

“शान्ति प्रक्रियाको बाँकी काम अविलम्ब टुंग्याउन चाहन्छौँ । पीडितलाई पीडा थपेर करकापसाथ मञ्जुर छौँ भनेर होइन । पीडितमैत्री ढंगले समस्याको समाधान गर्नुपर्नेछ । पीडितमैत्री नहुने सम्भावना धेरै छ,” उनले भने, “दुवै पीडक पक्ष राज्य सञ्चालनमा छन् । टुंग्याउनुपर्ने सरकारले हो । हिजोको दुवै पीडक सरकारमा छन् ।”

आफूले सरकारको नेतृत्व गर्दा सो विषय टुंग्याउन खोजेको तर नेकपा (माओवादी केन्द्र)का अध्यक्ष प्रचण्ड र नेपाली कांग्रेसका सभापति शेरबहादुर देउवाले नमानेको उनले बताए ।