काठमाडौं । राष्ट्रिय स्वतन्त्र पार्टी (रास्वपा)का सांसद गणेश पराजुलीले देशमा टिकटक बन्द गरिएपछि कति अपराध र विकृति नियन्त्रण भयो, त्यसको प्रतिवेदन कहिले प्रस्तुत गर्ने भन्दै प्रश्न गरेका छन् । आइतबार प्रतिनिधिसभा बैठकमा प्रधानमन्त्रीसँग प्रश्नोत्तर कार्यक्रममा उनले यस्तो प्रश्न गरेका हुन् ।

उनले टिकटक बन्दपश्चात् कति व्यवसायी पलायन र बेरोजगार भए त्यसको पनि प्रतिवेदन सरकारले सार्वजनिक गर्छ कि गर्दैन भन्दै प्रश्न गरे ।

“अपराध र विकृति फैलाएको भन्दै टिकटक बन्दको नाटक मञ्चन भयो । सत्तापक्षका नेताको अकाउन्ट अपडेट भएको पाइन्छ । सरकारले बन्द गरेर अपराध र विकृतिमा भएको न्यूनीकरणमा प्रतिवेदन कहिले सार्वजनिक गर्छ ? टिकटक बन्दपछि कति व्यवसायी पलायन भए, कति बेरोजगार भए भन्ने प्रतिवेदन सार्वजनिक गर्छ कि गर्दैन ?,” पराजुलीको प्रश्न थियो ।

संसद्‌मा प्रधानमन्त्रीसँग प्रश्नोत्तर (पूर्णपाठ)

जवाफमा प्रधानमन्त्री पुष्पकमल दाहाल ‘प्रचण्ड’ले टिकटकबारे सरकारले अचानक र एकाएक निर्णय नगरेको बताए । “गठबन्धन दलमा पटक–पटक गरिएका छलफल, प्रमुख प्रतिपक्षी दलका बीचमा भएको छलफलमा समझदारी बनाएर गरिएको हो,” उनले भने ।