काठमाडौं । नेपाल चिकित्सक संघले पछिल्लो निर्णय पुनर्विचारको आग्रहसहित यूएसएमएलईको सचिवालयमा पत्राचार गरेको छ । नेपाली चिकित्सकबारे यूएसएमएलई सचिवालयले गरेको निर्णय सच्याउन संघले मंगलबार इमेलमार्फत सचिवालयमा पत्र पठाएको हो । संघले यसअघि परराष्ट्र मन्त्रालयमार्फत समस्या समाधानका निम्ति पहल गरेको थियो ।

“यूएसएमएलईमा नेपालीहरूले परीक्षा दिएका सेन्टरलाई जोडेर नतिजा रद्दको निर्णय हुनुले नेपाली चिकित्सकको मिहिनेतलाई अवमूल्यन गरेको देखियो । त्यसैले पनि निर्णय पुनर्विचारका लागि पत्र लेखेका हौँ,” संघका महासचिव डा. सञ्जीव तिवारीले बाह्रखरीसित भने ।

• अमेरिकामा नेपाली चिकित्सकबारे यूएसएमएलईको विवाद के हो  ? 

अमेरिकाको यूएसएमएलई (युनाइटेड स्टेट्स मेडिकल लाइसेन्सिङ एक्जामिनेसन) सचिवालयले गएको जनवरी ३१ मा विज्ञप्ति जारी गर्दै सन् २०२३ मा यूएसएमएलई दिएका नेपाली फिजिसियनको नतिजा रद्द भएको जानकारी गराएको थियो ।

२०२३ मा सो परीक्षा दिएका एक हजार ४०० बढी संघको सम्पर्कमा आएको डा. तिवारीले जानकारी दिए ।