काठमाडौं । नेकपा (एमाले)का सांसद कृष्णगोपाल श्रेष्ठले त्रिभुवन अन्तर्राष्ट्रिय विमानस्थलमा प्रहरी र अध्यागमनका कर्मचारीबीचको झगडा लज्जाको विषय भएको बताएका छन् ।

प्रतिनिधिसभाअन्तर्गतको राज्यव्यवस्था तथा सुशासन समितिको आइतबारको बैठकमा उनले त्यो झगडाले सिंगो देशलाई असर गर्ने बताए ।

“नेपाल सरकारको एउटा निकायको अधिकारीले नै अर्को निकायलाई लात्ताले हानेको दृष्य देखियो, यो झनै लज्जास्पद भयो,” उनले भने ।

सो झगडाको भिडियो बाहिर छ्यापछ्याप्ती भएकामा पनि उनले असन्तुष्टि जनाए ।

“विमानस्थलको सम्पूर्ण विवरण त त्यहाँभित्रको सीसी क्यामेरा र त्यहाँको टिमले खिच्यो होला नि, मिडियाहरू त त्यहाँ गएका थिएनन् होला । तर, त्यो भिडियो छ्यापछ्याप्ती भयो, योचाहिँ थप लज्जाको विषय हो,” उनले भने ।