काठमाडौं । नेपालमा करिब ३२ प्रतिशत व्यापारिक प्रतिष्ठानहरू अवैध ढंगले सञ्चालन भइरहेको तथ्यांक सार्वजनिक भएको छ । राष्ट्रिय तथ्यांक कार्यालयले शुक्रबार काठमाडौंमा एक कार्यक्रमबीच सार्वजनिक गरेको नेपाल व्यापार सर्वेक्षणमा यस्तो तथ्यांक सार्वजनिक भएको हो । 

सर्वेक्षणमा करिब ६८ प्रतिशत व्यापारिक प्रतिष्ठान भने सरकारी निकायमा दर्ता भएर सञ्चालनमा आएको तथ्य समावेश गरिएको कार्यालयका निर्देशक प्रभा बरालले बताइन् । मुलुकमा वैध रूपमा सञ्चालनमा रहेका व्यापारिक प्रतिष्ठानहरूमध्ये महिलाको स्वामित्वमा २६ प्रतिशत र पुरुषको स्वामित्वमा ७४ प्रतिशत रहेको सर्वेक्षणले देखाएको छ । 

२०६५ सालयता गरिएको उक्त सर्वेक्षणअनुसार मोटर ट्रेड एण्ड रिपियरमा महिलाको स्वामित्व सबैभन्दा कम ८ प्रतिशत छ ।

सर्वेक्षणमा तलव ज्याला र अन्य सुविधा नलिई काममा संलग्न व्यक्तिहरूको संख्या तलव सुविधा लिएर काम गर्नेभन्दा धेरै रहेको दाबी गरिएको छ ।