काठमाडौं । संघीय संसद्का महासचिव पद्मप्रसाद पाण्डेयले हराएको भनिएको नागरिकताबाटै राहदानी लिएको पाइएको छ ।

परराष्ट्र मन्त्रालयले उपलब्ध गराएको कागजातमा पाण्डेयले २०६९ साउन २ गते अर्थात् १७ जुलाई २०१२ मा जिल्ला प्रशासन कार्यालय पाल्पाबाट लिएको नागरिकता नम्बर ३९१०११/१५५ बाट ०६०१८३७० नम्बरको साधारण राहदानी लिएका थिए ।

यो नागरिकता उनले २०६६ भदौ ८ गते ६ वर्ष उमेर घटाएर लिएका थिए । पाण्डेयले पहिलो राहदानी बनाएको चार महिनापछि नै २०६९ मंसिर २० अर्थात् ५ डिसेम्बर २०१२ मा ‘हरायो भनिएको नागरिकता’ नम्बर ३५ प्रयोग गरेर विशेष राहदानी लिएको पाइएको छ ।

उनको विशेष राहदानी नम्बर ००५९४४९ रहेको छ । यो पासपोर्ट प्रयोग गरेर पाण्डेय विदेश यात्रामा निस्किएको पाइएको छ । उनी पाँचपटक यही राहदानी प्रयोग गरेर विदेश भ्रमणमा गएको विवरण अध्यागमनले उपलब्ध गराएको छ ।

पाण्डेयले २०७६ असार ३० अर्थात् १५ जुलाई २०१९ मा कूटनीतिक राहदानी पनि पुरानै ३५ नम्बरको नागरिकता प्रयोग गरेर लिएको पाइएको छ । उनले कूटनीति राहदानी लिनका लागि महान्यायाधीवक्ता कार्यालयको सिफारिसपत्र र महान्यायाधीवक्ता कार्यालयको वैदेशिक भ्रमणमा मनोनयन भएको सम्बन्धी कागजात पेस गरेका छन् । 

कूटनीतिक राहदानीको नम्बर ००२९७९८ रहेको छ । यो राहदानी प्रयोग गरेर उनी एकपटक विदेश भ्रमणमा गएको विभागको तथ्यांकले देखाउँछ ।

दोस्रो राहदानी (जुन हरायो भनिएको नागरिकताबाट बनाएका थिए) बनाएको सात वर्षपछि अर्थात् २०७६ मंसिर २२ गते पाण्डेयले पुरानो नागरिकता भेटिएको भन्दै दुवै नागरिकता खारेज गराएर अर्को नागरिकता लिएका थिए ।

उक्त नागरिकता नम्बर ३९–०१–७६–०५५१५ रहेको छ ।