काठमाडौं । दक्षिण अफ्रिकामा भएको युवा एकदिवसीय क्रिकेटमा सहभागी भई नेपाली यू–१९ क्रिकेट टिम स्वदेश फर्किएको छ । 

विश्वकपमा सुपर सिक्ससम्मको यात्रा तय गरेको नेपाली टिम सोमबार बिहान त्रिभुवन अन्तर्राष्ट्रिय विमानस्थल ओर्लिएको हो । प्रतियोगिताको समूह चरणमा नेपालले न्युजिल्याण्ड र पाकिस्तानसँग हार बेहोरे पनि अन्तिम खेलमा अफगानिस्तानविरुद्ध एक विकेटको रोमाञ्चक जित निकाल्दै नेपाली टिमले सुपर सिक्सको यात्रा तय गरेको थियो । तर, सुपर सिक्समा भने नेपाल भारतसँग १३२ रनले र बंगलादेशसँग पाँच विकेटले पराजित भएको थियो ।

सुपर सिक्समा दुवै खेल हारे पनि नेपाली टिमका मुख्य प्रशिक्षक जगत टमाटा भने टोलीको प्रदर्शनबाट सन्तुष्ट देखिए । उनले विश्वकपमा टिमले लक्ष्यअनुसार नै प्रदर्शन गरेको बतए ।

“हामीले जुन लक्ष्य लिएर गएका थियौँ । त्यसलाई भेट्टाउन सफल भर्यौं । न्युजिल्यान्डसँग पहिलो खेल खेल्दा ३०–४० रन धेरै दिन पुग्यौँ । पाकिस्तानसँग खेल्दा केही सुधारिएको प्रदर्शन गर्यौँ । अफगानिस्तानसँग जित निकाल्न सफल भयौँ,” प्रशिक्षक टमाटाले भने, “समग्रमा हामीले धेरै राम्रो क्रिकेट खेल्यौँ । त्यहाँ सात–आठ दिनअघि नै पठाएकोमा क्यानलाई पनि धन्यवाद व्यक्त गर्न चाहन्छु । अभ्यास खेलले पनि हामीलाई धेरै फाइदा भयो । जसरी समर्थकहरुले साथ दिइरहनुभएको छ । त्यसका लागि धेरै धन्यवाद र यसरी नै माया गरिराख्नुस् भन्न चाहन्छु ।”

नेपाली टिमका कप्तान देव खनालले भने ब्याटिङमा सोचेजस्तो प्रदर्शन हुन नसकेको बताए ।

“ब्याटिङमा अलि राम्रो गर्न सकिन्थ्यो जस्तो मलाई लाग्छ । अफगानिस्तानविरुद्धको जितको पल ब्याख्या गर्न शब्द नै छैन । अन्तिम विकेट हुँदा दुई–तीन रन बाँकी थियो । तर, सुवास स्ट्राइकमा भएकाले मलाई उसले गर्न सक्छ भन्ने विश्वास थियो । अफगानिस्तान जस्तो टिमले यति कम लक्ष्य फेरि पनि दिँदैन भनेर जसरी पनि जित्नुपर्छ भन्ने मनसायले खेलिरहेको थिए,” देवले भने ।

प्रतियोगितामा नेपालले खेलेका पाँच खेलमा एक अर्धशतकसहित १८५ रन बनाएका देव टिमबाट सबैभन्दा धेरै रन बनाउने खेलाडी समेत हुन् । तर, देवले भने ठूलो स्कोर बनाउन नसक्दा निराश रहेको बताए ।

“ठूलो स्कोर गर्न नसक्दा एकदमै निराश छु । बललाई फुटबल जसरी हेरिरहेको थिए । तर, पनि ३०–३५ रनभन्दा माथि जान सकिरहेको थिइन् । तर, अहिले सिक्ने बेला छ । हरेक खेलमा केही न केही सिकिन्छ । कसरी टिमको इनिङ सम्हाल्ने र ठूलो स्कोर बनाउने भन्ने पनि सिक्दैछु,” देवले थपे ।

नेपाली टिमका अलराउन्डर गुल्सन झाले पनि प्रतियोगिता आफूले सोचेअनुसार हुन नसकेको बताए ।

“समग्रमा राम्रो भयो । टिमले राम्रो खेल्यो । बलिङ मबाट राम्रो थियो, ब्याटिङमा राम्रो भएन । मेरो पनि धेरै आशा थियो, भएन । कहिले कहीँ खेलाडीमा यस्तो हुन्छ । अनुभव राम्रो भयो,” गुल्सनले भने ।