काठमाडौं । सत्तासाझेदार दल जनमत पार्टीको केन्द्रीय सचिवालय बैठकमा संसद्‌मा प्रभावकारी भूमिका खेल्नेबारे छलफल गरिएको छ । काठमाडौंको बुद्धनगरस्थित पार्टी केन्द्रीय कार्यालयमा आइतबार बसेको सचिवालय बैठकमा समसामयिक राजनीति र सोमबारदेखि सुरु हुने संसद् अधिवेशनमा प्रभावकारी भूमिका खेल्नेबारे छलफल गरिएको हो ।

जनमतका प्रवक्ता डा. शरदसिंह यादवले बैठकमा पार्टीका संगठन र वडा अधिवेशनका बारेमा छलफल भइरहेको बताए । उनले मधेस प्रदेशमा जनता समाजवादी पार्टी (जसपा), नेपालले गठबन्धनको सहमति तोड्दा आफूहरू सरकारबाट बाहिरिनुपरेको सुनाए ।

मधेसमा सुरुको एक वर्ष जसपाले सरकार सञ्चालन गर्ने, त्यसपछि जनमत र जनमतपछि नेपाली कांग्रेसले सरकार चलाउने गठबन्धन दलबीच सहमति भए पनि कार्यान्वयन नभएकाले सरकारबाट बाहिरिएको उनको भनाइ छ ।

“...मधेस प्रदेशबाट सरकारबाट हामी जुन बाहिरिएका छौँ, त्यहाँ सरकार नेतृत्व परिवर्तनको जुन कुरा छ, जसपाद्वारा सहमति भाँडिएको अवस्था छ, त्यसबारेमा पनि छलफल भइरहेको छ,” उनले भने, “संघीय सरकारमा सहभागिताको विश्लेषण र काम–कारबाहीको समीक्षा हुँदै छ ।”

प्रवक्ता यादवले अरूको तुलनामा संघीय सरकारमा आफ्नो पार्टीबाट सहभागी मन्त्रीहरूलै राम्रो काम गरेको जिकिर गरे । न्युज एजेन्सी नेपाल