काठमाडौं । अर्थमन्त्री डा. प्रकाशशरण महतले आउँदो आर्थिक वर्षमा खेलकुद क्षेत्रको बजेट बढाउने प्रतिबद्धता व्यक्त गरेका छन् । शनिबार काठमाडौंमा प्रधानमन्त्री कप राष्ट्रिय पुरुष क्रिकेट प्रतियोगिताका विजेतालाई पुरस्कार प्रदान गर्दै उनले यस्तो बताएका हुन् ।

उनले अरू क्षेत्रको कम गरेर भए पनि आउँदो आर्थिक वर्षमा खेलकुदमा उल्लेख्य बजेट थप्ने उल्लेख गरे । खेलकुदमा सबैभन्दा धेरै बजेट क्रिकेटमा छुट्ट्याइने उनले बताए ।

उनले क्रिकेटलाई थप प्रोत्साहन गर्न सरकारले राष्ट्रिय गौरवको मान्यता दिएर रंगशालाहरू बनाइरहेको समेत बताए । क्रिकेट अन्तर्राष्ट्रिय रूपमा नेपाललाई चिनाउने महत्त्वपूर्ण विधा भएको उनको भनाइ छ ।

“...समग्रमा क्रिकेट अन्तर्राष्ट्रिय रूपमा नेपाललाई पहिचान गराउने महत्त्वपूर्ण विधा भएकाले त्यसमा पनि हामी खर्च बढाउँछौँ । सरकार मन्दीबाट विस्तारै उत्रिन खौज्दै छ । स्रोत र साधनको सीमितता छ । माग धेरै छ, आवश्यकता धेरै छन्,” उनले भने, “अरू क्षेत्रको बजेट कम गरेर भए पनि हामी खेलकुद क्षेत्रमा आउँदो आर्थिक वर्षको बजेटमा उल्लेख्य बजेट थप्छौँ । त्यसमा सबैभन्दा ज्यादा बजेट क्रिकेटमा प्रोत्साहन गर्न र अघि बढाउन खर्च गर्नेछौँ ।” न्युज एजेन्सी नेपाल