काठमाडौं । प्रधानमन्त्री कप राष्ट्रिय पुरुष क्रिकेट प्रतियोगिताको उपाधि नेपाल पुलिस क्लबले जितेको छ । कीर्तिपुरस्थित त्रिवि क्रिकेट मैदानमा शनिबार भएको फाइनलमा पुलिसले अर्को विभागीय टोली त्रिभुवन आर्मी क्लबलाई ६ विकेटले पराजित गर्यो ।
उपाधि जितेको पुलिसले १० लाख रुपैयाँ प्राप्त गर्यो । उपविजेता आर्मीले पाँच लाख रुपैयाँ पायो ।
आर्मीले दिएको १८२ रनको सामान्य लक्ष्य पुलिसले ३५.५ ओभरमा चार विकेटको क्षतिमा पूरा गर्यो । पुलिसका निम्ति शंकर रानाले ४३ बलमा पाँच चौका र ६ छक्काको मद्दतमा ६२ रन बनाए । आरिफ शेखले २७, अमित श्रेष्ठले २८ र कुशल भुर्तेलले १४ रन जोडे ।
आर्मीका जितेन्द्र मुखिया, कुशल मल्ल, सहाब आलम र बसिर अहमदले समान एक/एक विकेट लिए ।
टस हारेर पहिले ब्याटिङको निम्तो पाएको आर्मीले ४९.५ ओभरमा सबै विकेट गुमाउँदै १८१ रन बनाएको थियो ।
आर्मीका विवेक यादवले ८१ बलमा सात चौका र एक छक्काको मद्दतले ६३ रनको योगदान गरे । सोमपाल कामीले ३९, इमरान शेखले २८, कुशल मल्लले १७ र जितेन्द्र मुखियाले अविजित १६ रन बनाए ।
पुलिसका दीपेन्द्रसिंह ऐरी र ललितनारायण राजवंशीले समान तीन/तीन विकेट लिए । सागर ढकाल, कुशल भुर्तेल र करण केसीले समान एक/एक विकेट लिए । रासस
