वर्षका बिहानीहरू 
(उपन्यास : समीर नेपाल) 
उपन्यासकार समीर नेपालको केही समयअघि प्रकाशित उपन्यास हो, ‘वर्षका बिहानीहरू’ ।

उपन्यासकार समीर आफ्नो भनाइमा लेख्छन् ‘त्यो केटो मै थिएँ । काठमाडौंमा मासिक रूपमा संचालन हुने साहित्य सन्ध्यामा कहिले कविता त कहिले कथा लिएर म पुग्ने गर्थेँ । नेपाल ल क्याम्पसको एउटा कक्षा कोठामा कार्यक्रम थियो साहित्य सन्ध्याको । प्रमुख हुनुहुन्थ्यो पारिजात । ...’

ओरिएन्टल पब्लिकेसनले प्रकाशनमा ल्याएको १२८+४ पृष्ठको यस उपन्यासको मूल्य ३५०– रुपैयाँ राखिएको छ ।

०००
अब तिम्रो पालो 
(कवितासंग्रह : नारायण तिवारी)
साहित्यकार नारायण तिवारीको पछिल्लो प्रकाशित कृति हो ‘अब तिम्रो पालो’ । यसअघि दुईवटा कविताकृति प्रकाशनमा ल्याइसकेका तिवारीको यो तेस्रो कवितासंग्रह हो । उनका कथाकृति, लघुउपन्यास, लघुकथा, बालकथा तथा संस्मरणसंग्रह पनि प्रकाशित छन् ।

कृतिभित्र साहित्यकार तिवारी ‘मेरो पालो’मा लेख्छन् : ‘कविताका कुरा भन्दिनँ— कविताले नै भनुन् ।

मेरा कुरा पनि कवितामा नै छन्— म फेरि किन बोलौँ ? ...’

यस कृतिभित्र प्रा. कृष्ण पोखरेल र साहित्यकार राजवको भूमिका समेटिएको छ । 
साझा प्रकाशनद्वारा प्रकाशित १६०+४ पृष्ठको यस कविताकृतिको मूल्य ३२५– रुपैयाँ राखिएको छ ।

०००

धर्मदर्शन
(दर्शन : कमल रिजाल)
पत्रकारिता क्षेत्रमा लामो समय खर्चिएका कमल रिजाल आध्यात्म साहित्यमा क्रियाशील सर्जक हुन् । उनको पछिल्लो कृति हो ‘धर्मदर्शन’ । जसलाई उनले प्रयोगात्मक सिर्जना भनेका छन् । उनका आध्यात्म, चिन्तन, लोकसंस्कृति, नीतिकथासहित थुप्रै कृति प्रकाशित छन् ।

यस कृतिको लेखकीयमा रिजाल लेख्छन् : ‘अहिलेसम्म लेखिएकामध्ये नितान्त भिन्न शैलीमा लेखिएको कृति हो मेरो यो । विषयवस्तु करिब उस्तैउस्तै भए पनि प्रस्तुति भने पूर्णतः भिन्न रहेको छ यसको । ...’
साझा प्रकाशनद्वारा प्रकाशित ७२+४ पृष्ठको यस कृतिको मूल्य १८५– रुपैयाँ राखिएको छ ।

०००

समृद्धिको हुटहुटी
(दृष्टिकोण : अश्विनकुमार पुडासैनी)
लेखक अश्विनकुमार पुडासैनीको दोस्रो कृतिका रूपमा बजारमा आएको पुस्तक हो ‘समृद्धिको हुटहुटी’ । बैंकिङ क्षेत्रमा कार्यरत पुडासैनीको यस कृतिभित्र समृद्धिका लागि आवश्यक एक सय चिन्तनहरू समावेस गरिएको छ ।

यस कृतिको लेखकीयमा पुडासैनी लेख्छन् : ‘उज्यालो मृत्यु पछि मैले जीवनलाई नितान्त बेग्लै किसिमले हेर्न थालेको छु । अस्पतालबाट फर्केर घरमा आराम गरिरहँदा मैले अब त म बाँचेँ, मृत्युको भयबाट पनि तत्कालका लागि मुक्त भएँ, अब मैले गर्नुपर्ने काम कर्तव्य के हुन सक्छन् भनेर निरन्तर चिन्तन मनन गरिरहेँ । ...’

दिव्या देउराली प्रकाशन प्रा.लि.द्वारा प्रकाशित १४८+४ पृष्ठको यस पुस्तकको मूल्य ३७५– रुपैयाँ राखिएको छ । यसबापत प्राप्त हुने रकम मुटु बचाउने अभियानका लागि समर्पित गरिने पुस्तकमा उल्लेख छ ।

००० 
अन्त्य कहाँबाट सुरु हुन्छ ?
(कवितासंग्रह : देविका तिमिल्सिना)
साहित्यकार देविका तिमिल्सिना विशेषतः कथा साहित्यमा सक्रिय छन् । उनका कथाकृतिहरू प्रकाशित भइसकेका छन् । कथा साहित्यमा कलम चलाए पनि उनका कविताहरूको सँगालो पछिल्लो समय प्रकाशनमा आएको छ ‘अन्त्य कहाँबाट सुरु हुन्छ ?’ ।

मानवअधिकारकर्मीका रूपमा क्रियाशील उनी निबन्धकार तथा सम्पादक पनि हुन् । यस कृतिमा लेखकीयमा तिमिल्सिना लेख्छन् :‘...कवितासंग्रह संगतअनुसारको फल । मेरो भन्नु केही छैन यी कविताहरूबारे । अब यी कविताहरू समाहित भएका छन् नेपाली साहित्यजगत्मा । बाँकी काम नेपाली साहित्यका पाठक र विवेचकको ।’

नेपाल स्रष्टा समाजद्वारा प्रकाशित १०४+४ पृष्ठको यस कविताकृतिको मूल्य १५०– रुपैयाँ राखिएको छ ।