काठमाडौं । नेपाली राष्ट्रिय महिला फुटबल टिमकी फरवार्ड सावित्रा भण्डारी (साम्बा)ले फ्रान्सको शीर्ष डिभिजन लिग खेल्ने भएकी छन् । फ्रान्सेली डिभिजन वान फेमिनिनको क्लब एन अभान्त गेङगाम एफसीले शुक्रबार एक भिडियो सार्वजनिक गर्दै सावित्रालाई अनुबन्ध गरेको पुष्टि गरेको हो ।
यसै वर्ष इजरायली क्लबमा अनुबन्ध हुँदै युरोपको शीर्ष डिभिजन खेल्ने पहिलो नेपाली खेलाडी बनेकी सावित्राले एक वर्षको अन्तरालमै फ्रान्सेली लिगसम्मको यात्रा तय गरेकी हुन् । फ्रान्सेली महिला लिग विश्वकै उत्कृष्ट १० महिला फुटबल लिगमध्येको एक हो ।
सावित्राले यसै सिजन इजरायली क्लब हापोयल रानानाबाट घरेलु लिग खेलेकी थिइन् । इजरायली लिगका निम्ति त्यहाँ पुगे पनि गाजा क्षेत्रमा द्वन्द्व चर्कंदा सावित्रा नेपाल फर्किएकी थिइन् । इजरायली क्लब पुग्नुअघि सावित्राले भारतीय महिला लिगमा उत्कृष्ट प्रदर्शन गरेकी थिइन् ।
सावित्रा अनुबन्धित एना भान गेङगाङ्प १२ खेलबाट आठ अंक जोड्दै हाल तालिकाको १०औँ स्थानमा छ । १२ टिम सहभागी लिगमा पुछारका दुई रेलिगेसनमा पर्ने प्रावधान छ । लिगमा अब एना भान गेङ्गाङ्पले १० खेल खेल्न बाँकी छ ।
अन्तर्राष्ट्रिय फुटबलमा ४३ गोल गरिसकेकी सावित्रा घरेलु नेपाली टिमकै उच्च गोलकर्ता समेत हुन् । उनी विभागीय टिम एपीएफबाट घरेलु फुटबल खेल्छिन् ।
