बागलुङ । बागलुङको माथिल्लो क्षेत्रमा यो वर्ष दोस्रोपटक हिमपात भएको छ । बुधबार साँझदेखि मौसम परिवर्तन भएसँगै आज बिहानैदेखि हिमपात सुरु भएको हो ।

हिमपातले ढोरपाटन उपत्यका सेताम्य बनेको छ । बागलुङ, पूर्वी रुकुम र रोल्पाको सिमाना पातीहाल्नेमा पनि हिमपात भएको निसीखोला गाउँपालिका–६ का स्थानीय ओमबहादुर घर्तीमगरले जानकारी दिए ।

बागलुङको ढोरपाटन सिकार आरक्ष क्षेत्रमा यो वर्ष दोस्रोपटक हिमपात भएको हो । बिहानैदेखिको हिमपातका कारण घोडा, खच्चड तथा वस्तुभाउलाई घाँस तथा दाना हाल्न समेत गाह्रो भएको स्थानीय गंगाबहादुर भण्डारीले जानकारी दिए । हिमपातले गर्दा ढोरपाटनदेखि बेँसी झर्नका निम्ति समस्या भएको भण्डारीले बताए ।

उनले भने, “हिजोदेखि मौसम निकै चिसो थियो, पानी पनि पर्न सकेको थिएन, घाम पनि लागेको थिएन । राति अलिअलि पानी पर्‍यो र एकैछिनमा हिउँ पर्‍यो । अहिले निकै चिसो छ, चिसोले गर्दा घरबाट बाहिर निस्किएर काम गर्न सकिँदैन । अब घाम लाग्यो भने मात्रै घर र गोठको काम गर्न सकिन्छ ।”

गएको मंसिर १८ गते ढोरपाटनलगायत आसपासका क्षेत्रमा यो वर्ष पहिलोपटक हिमपात भएको थियो । त्यसयता सामान्य वर्षा समेत हुन सकेको थिएन । लामो समयदेखि वर्षा नहुँदा किसानले लगाएका गहुँ, जौ बारीमै मर्न थालेका थिए । यो वर्षाले किसानलाई राहत मिलेको स्थानीय प्रेमबहादुर घर्तीमगरले बताए । रासस