काठमाडौं । बलिङमा आकाश चन्द र ब्याटिङमा देव खनाल कप्तानी इनिङ खेलेपछि अफगानिस्तानविरुद्ध एक विकेटको रोमाञ्चक जित निकाल्दै नेपाल आईसीसी यू–१९ विश्वकपको सुपर सिक्समा प्रवेश गरेको छ ।
अफगानिस्तानलाई हराउँदै दुई अंक जोडेपछि नेपालले समूह ‘डी’ को तेस्रो स्थानमा पक्का गर्दै सुपर सिक्स यात्रा तय गरेको हो ।
शुक्रबार दक्षिण अफ्रिकाको इस्ट लन्डनस्थित बफेलो पार्कमा सम्पन्न खेलमा अफगानिस्तानले प्रस्तुत गरेको १४६ रनको लक्ष्य नेपालले ४४.४ ओभरमा नौ विकेट गुमाएर पूरा गर्यो ।
नेपालले स्कोरबोर्डमा १४४ रन जोड्दा आकाश चन्दलाई नवौँ विकेटको रुपमा गुमाएको थियो । यसपछि नेपाललाई जितका लागि दुई रन आवश्यक हुँदा अफगानिस्तानलाई एक विकेटमात्र पर्याप्त थियो ।
अफगानिस्तानका बलर अरब गुलले ४५औँ ओभरको पहिलो बल वाइड फ्याकेपछि खेल ‘टाई’ भएको थियो । जितका लागि एक रन आवश्यक हुँदा सोही ओभरको चौथो बलमा सुवास भण्डारीले चौका प्रहार गर्दै नेपालको रोमाञ्चक जित निश्चित गरे ।
नेपालको जितमा कप्तान देवले धैर्यपूर्ण प्रदर्शन गर्दै अर्धशतक बनाए । क्रिजको एक एन्डबाट लगातार विकेट जाँदा सुझबुझपूर्ण ब्याटिङ गरेका देवले ५८ रन बनाउँदै नेपाललाई जितसम्म डोहोर्याए । १५–२ को कठिन अवस्थामा ब्याटिङका लागि आएका देवले ८९ बलमा सात चौका प्रहार गरे । उनी आउट हुँदा नेपाल १२७–७ को अवस्थाामा थियो ।
देवबाहेक, नेपाली टिमको खातामा दीपक बोहराले ४२ बलमा चार चौकासहित २७ रन थपे । आकाश त्रिपाठीले १६ र अर्जुन कुमालले १० रन थपे । यसबाहेक, नेपालका अन्य कुनै ब्याटरले दोहोरो अंकमा रन बनाउन सकेनन् ।
त्यसअघि टस हारेर बलिङमा आएको नेपालबाट आकाश चन्दले घातक बलिङ गरेपछि अफगानिस्तान ४०.१ ओभरमा १४५ रनमै समेटिएको थियो ।
अफगानिस्तानलाई कमजोर योगफलमा रोक्न नेपालका आकाशले पाँच विकेट लिएका थिए । उत्कृष्ट बलिङ गरेका आकाशले आठ ओभरमा ३४ रनमात्र खर्चिए । उनले खेलको दोस्रो, छैटौँ, आठौँ, १०औँ र १२औँ ओभरमा नेपाललाई सफलता दिलाएका थिए ।
आकाशबाहेक, दीपेश कँडेलले दुई विकेट लिए । यस्तै, गुल्सनकुमार झा, सुवास भण्डारी र तिलक भण्डारीले समान एक विकेट हात पारे ।
अफगानिस्तानका अल्लाह मोहम्मद घजानफरले ३७ रन बनाए । कप्तान नासिर खान मरुफखिलले ३१ र र फरिदुन दावुदजाईले २९ रन थपे । ८– को दयनीय अवस्थाबाट यी दुईले नवौँ विकेटका लागि ५५ रनको साझेदारी गर्दै अफगानिस्तानलाई सम्मानजनक योगफलसम्म डोहोर्याएका थिए ।
नेपालविरुद्ध अफगानिस्तानका चार ब्याटरले रनको खातासमेत खोल्न सकेनन् ।
आजको जितसँगै नेपालले सुपर सिक्सको समूह–१ मा स्थान पक्का गरेको छ । यो समूहमा समूह ‘ए’ का शीर्ष तीन टिम र समूह ‘डी’का माथिल्लो तीन टिमबीच प्रतिस्पर्धा हुने छ । जसबाट शीर्ष दुई टिम सेमिफाइनल प्रवेश गर्ने छन् । समूह ‘ए’ का भारत, बंगलादेश, आयरल्यान्ड र अमेरिकामध्ये शीर्ष तीन टिमसँग खेल्न पाउने छ । जसबाट शीर्ष दुई टिम सेमिफाइनल प्रवेश गर्नेछन् ।
यू–१९ विश्वकपको चार समूहबाट कुल १२ टिम सुपर सिक्समा प्रवेश गर्नेछन् । जसलाई प्रत्येक समूहमा ६ टिम रहने गरी दुई समूहमा विभाजन गरिएको छ ।
-1706524096.JPG)
