काठमाडौं । अन्तर्राष्ट्रिय प्रहरी अपराध संगठन (इन्टरपोल)ले बागलुङको ढोरपाटन नगरपालिकाका मेयर देवकुमार नेपालीविरुद्ध रेड नोटिस जारी गरेको छ । सहकारी ठगी प्रकरणका फरार आरोपी मेयर नेपाली नेपालमा फेला नपरेपछि उनीविरुद्ध रेड नोटिस जारी भएको हो । 

नौ महिनादेखि फरार रहेका उनलाई नेपाल प्रहरीको एनसीबी काठमाडौंले खोजीका लागि इन्टरपोलमार्फत रेड नोटिसका लागि इन्टरपोलको प्रधान कार्यालय फ्रान्स पत्र पठाएको थियो ।

एनसीबी काठमाडौंको पत्राचारपछि इन्टरपोल कार्यालयले रेड नोटिस जारी गरेको हो । २०८० जेठ ५ देखि बिदामा बसेका नेपाली त्यसयता भने सम्पर्कविहीन भएका छन् । 

रेड नोटिस जारी भएसँगै इन्टरपोलको सदस्य राष्ट्रहरू १९५ देशका प्रहरीले नेपालीलाई पक्राउ गरेर नेपाल फर्काउने बाटो खुलेको छ । प्रहरी उच्च स्रोतका अनुसार केही दिनअघि मात्रै उनीविरुद्ध रेड नोटिस जारी भएको हो ।

“डिफ्युजन नोटिसको अवधि छोटो हुने हुँदा हामीले रेड नोटिसको लागि पत्रचार गरेका थियौं । सोहीअनुसार रेड नोटिस जारी भएको हो,” उच्च प्रहरी स्रोतले बाह्रखरीलाई भने । 

प्रहरीका अनुसार उनी भारत हुँदै अन्य तेस्रो मुलूक पुगेको आशंका छ । फरार रहेकै अवस्थामा उनी दुई महिनाअघि भने फेसबुक लाइभमा आएका थिए । त्यसयता भने फेसबुकमा पनि सक्रिय छैनन् ।

• ढोरपाटनका धनाढ्य मेयर : हेलिकोप्टरमा सयर गर्थे, सहकारीको एक अर्ब हिनामिनापछि फरार

बागलुङस्थित इमेज बचत तथा ऋण सहकारीका संस्थापक अध्यक्ष रहेका उनीमाथि बचतकर्ताको एक अर्ब ३१ करोडभन्दा बढी रकम हिनामिना गरेको आरोप छ । 

उनी सम्पर्कविहीन भएपछि नगरपालिकाको कामकारबाही उपप्रमुख धनबहादुर कायतले गर्दै आएका छन् । सहकारीमा करिब दुई हजार बचतकर्ता थिए ।

उनीबाहेक सहकारीका सञ्चालक समितिका सदस्य चित्रबहादुर भण्डारी, सहकारीको मुख्य कार्यालय बागलुङका लेखा प्रमुख लालमणि रोका र प्रबन्ध निर्देशक शक्ति किसान पक्राउ परिसकेका छन् । उनीहरूलाई जिल्ला अदालत बागलुङले पुर्पक्षका लागि थुनामा पठाएको छ ।

जीबी राईविरुद्ध पनि रेड नोटिसका लागि पठायो पत्र
कास्कीको पोखरास्थति सूर्यदर्शन बचत तथा ऋण सहकारीका संस्थापक अध्यक्ष गितेन्द्रबाबु राई (जीबी)विरुद्ध समेत एनसीबी काठमाडौंले रेड नोटिसका लागि इन्टरपोलको कार्यालयलाई पत्रचार गरेको छ । 

सहकारीको रकम हिनामिना प्रकरणमा जोडिएपछि फरार रहेका उनलाई रेड नोटिसका लागि इन्टरपोलको कार्यालयलाई पत्रचार गरेको छ ।

प्रहरी उच्च स्रोतका अनुसार यही साता उनीविरुद्ध रेड नोटिसका लागि पत्रचार भएको हो । राईविरुद्ध समेत केही दिनभित्र नोटिस जारी हुने प्रहरी अधिकारीको दाबी छ ।

ग्यालेक्सी टेलिभिजनका सञ्चालक समेत रहेका ओखलढुंगाको सुनकोसी गाउँपालिका–१ का ४५ राईसहित हाल सूर्यदर्शन सहकारीका १५ जना आरोपी फरार छन् । जसमध्ये राई मुख्य आरोपी हुन् ।

आरोपी १९ जनामध्ये चारजना भने पुर्पक्षका लागि जेल चलान भएका छन् । पुर्पक्षका लागि थुनामा रहेका सहकारीका कोषाध्यक्ष कुमार रम्तेल, शविबहादुर गुरुङ, भविश्वर अर्यालसहित चारजना छन् ।

राईसहितको समूहले सहकारीको एक अर्ब ३५ करोड रुपैयाँ हिनामिना गरेको पाइएको छ । सहकारीमा रकम जम्मा गरेर फिर्ता नपाएको भन्दै एक हजार ३५ बचतकर्ताले प्रहरीमा जाहेरी दिएका थिए । सूर्यदर्शन सहकारीका बचतकर्ता भने १८ हजार रहेको कास्कीका प्रहरी प्रमुख एसपी मोहन थापाले जानकारी दिए ।

• जीबी राईसहित सूर्यदर्शन सहकारीका चार जना पक्राउ गर्न प्रहरीले गुहार्दै इन्टरपोल

प्रहरीमा उजुरी पर्न थालेपछि राई फरार थिए । राईविरुद्ध जिल्ला अदालत पोखराले साउन २४ मा पक्राउ पुर्जी जारी गरेको थियो । त्यही बेलादेखि नै उनी फरार छन् ।

प्रहरीले राईको सबै सम्पत्ति रोक्काका लागि सम्बन्धित कार्यालयलाई पत्राचार गरिसकेको छ । राई समेत नेपाल छाडेर विदेश भागेको आंशका प्रहरीको छ । अहिले मलेसियामा रहेको आशंका गरिएको छ । उनले समेत भारतीय बाटो (विमानस्थल) प्रयोग गरेको आंशका प्रहरीको छ ।

ग्यालेक्सी टेलभिजिन सञ्चालन गर्दा राईसँग जोडिएका राष्ट्रिय स्वतन्त्र पार्टीका सभापति रवि लामिछाने समेत हाल सोही सहकारी हिनामिना प्रकरणमा जोडिएका छन् ।