काठमाडौं । स्पेनिस ला लिगामा अल्मेरियाविरुद्ध २–० ले पछि परेको अवस्था उल्ट्याउँदै रियाल मड्रिडले सानदार जित निकालेको छ । आइतबार राति घरेलु मैदान सान्टियागो बर्नबेउमा रियालले अल्मेरियाविरुद्ध पहिलो हाफमै २–० ले पछि परेको अवस्थाबाट पुनरागमन गर्दै ३–२ को रोमाञ्चक जित निकालेको हो ।

खेलको पहिलो मिनेटमै लार्जी रामाजानीले गोल गर्दै अल्मेरियालाई अग्रता दिलाएका थिए । ४३औँ मिनेटमा एजर गोन्जालेजले गोल गरेपछि अल्मेरियाले पहिलो हाफमा घरेलु टिमविरुद्ध २–० को अग्रता बनाएको थियो ।

तर, ५७औँ मिनेटमा प्राप्त पेनाल्टीलाई सदुपयोग गर्दै रियालका जुड बेलिङ्घमले घरेलु टिमका निम्ति पहिलो गोल फर्काए । ६७औँ मिनेटमा भिनिसियस जुनियरले गोल गर्दै रियाललाई खेलमा फर्काएका थिए । इन्ज्युरी समयमा ड्यानी कार्भाहालले निर्णायक गोल गरेपछि रियालले ३–२ को सानदार जित निकाल्यो ।

जितसँगै २० खेलबाट ५१ अंक जोडेको रियाल ला लिगाको दोस्रो स्थानमा छ । २१ खेलबाट मात्र ६ अंकको अल्मेरिया पुछारमा छ । जारी सिजन लिगमा अल्मेरिया जितविहीन छ ।

आइतबार राति नै भएको अर्को खेलमा लिग लिडर जिरुनाले सेभियाको पोस्टमा पाँच गोल गर्‍यो । सेभियालाई ५–१ ले हराउँदा जिरुनाका अर्टेन डबाइकले ह्याट्रिक गरे । भिक्टोर सिगान्कोभ र क्रिस्थियन स्टुएनीले समान एक गोल थपे । सेभियाले रोमेरो बेमलको गोलमा अग्रता बनाए पनि फराकिलो हार व्यहोरेको हो ।

जितसँगै २१ खेलबाट ५२ अंक जोडेको जिरुना तालिकाको शीर्ष स्थानमा छ । समान खेलबाट १६ अंक जोडेको सेभिया १७औँ स्थानमा छ ।

हिजो नै भएको अर्को खेलमा साविक विजेता बार्सिलोनाले रियाल बेटिसविरुद्ध ४–२ को सहज जित दर्ता गर्‍यो ।