काठमाडौं । हाल सञ्चालित २० वाणिज्य बैंकमध्ये अधिकांशको नाफा घटेको छ । चालु आर्थिक वर्ष २०८०/८१ को पुस मसान्तसम्ममा २० मध्ये चार वाणिज्य बैंकको नफामा वृद्धि भएको छ । बाँकी १६ वाणिज्य बैंकको नाफामा कमी आएको हो ।

बैंकहरूले सार्वजनिक गरेको चालु आर्थिक वर्षको दोस्रो चैमाससम्मको अपरिष्कृत वित्तीय विवरणानुसार पुस मसान्तसम्म २० वाणिज्य बैंकले कुल २८ अर्ब ७६ करोड ५३ लाख रुपैयाँ नाफा कमाएका छन् । यो नाफा गत वर्षको तुलामा ९.९४ प्रतिशतल कम हो । गत वर्षको सोही अवधिमा २० वाणिज्य बैंकले ३१ अर्ब ९४ करोड ११ लाख रुपैयाँ नाफा आर्जन गरेका थिए ।

यो वर्ष बैंकहरूको खराब कर्जा बढ्दा नाफामा असर देखिएको हो । साथै, सरकारले मर्जर तथा प्राप्तिको बार्गेन पर्चेज गेन, एफपीओको प्रिमियम र अक्सनमा सेयर बिक्री गर्दा लिएको प्रिमियमलाई नाफा मानेर बोनस वितरण गर्ने बैंक तथ वित्तीय संस्थाहरूको नाफामा कर लिएपछि नाफा थप प्रभावित भएको मान्न सकिन्छ ।

गएको मंसिर अन्तिम साता सर्वोच्च अदालतले यस्तो कर तिर्नुपर्ने फैसला गरेपछि बैंक तथा वित्तीय संस्थासहित अरू कम्पनीहरूले झन्डै १४ अर्ब रुपैयाँ बुझाएका थिए । यसैको मारमा अधिकांश वाणिज्य बैंक परेका छन् ।

कृषि विकास बैंकले भने नाफामा सुधार गरेको छ । यस अवधिमा यो बैंकले एक अर्ब ५० करोड ३९ लाख रुपैयाँ नाफा आर्जन गरेको छ । गत वर्षको दोस्रो त्रैमाससम्म यो बैंक १२ करोड ८९ लाख रुपैयाँ घाटामा थियो ।

यस्तै, नाफा वृद्धि गर्नेमा हिमालयन, प्राइम कमर्सियल र एभरेस्ट बैंक छन् । वित्तीय विवरणानुसार गत वर्षको तुलनामा सबैभन्दा बढी नाफा वृद्धि हिमालयन बैंकले गरेको छ । यो बैंकको नाफा ५७ प्रतिशतले वृद्धि भएको छ ।

प्राइम कमर्सियल बैंकको ३२ प्रतिशत र एभरेस्ट बैंकको नाफा करिब ८ प्रतिशतले वृद्धि भएको छ ।

सर्वाधिक नाफा घट्नेमा नेपाल बैंक लिमिटेड छ । यो बैंकको नाफा ४९ प्रतिशतभन्दा बढीले घटेको छ ।

एनआईसी एशिया बैंकको करिब ४२ प्रतिशतले नाफामा कमी आएको छ ।

पुस मसान्तसम्म सबैभन्दा बढी नाफा नबिल बैंकले गरेको छ । यो बैंकले तीन अर्ब २० करोड रुपैयाँ नाफा आर्जन गरेको छ । ग्लोबल आइएमई बैंकले दुई अर्ब चार करोड रुपैयाँ नाफा आर्जन गरेको छ ।