काठमाडौं । गैरआवासीय नेपाली संघ (एनआरएनए)का निर्वाचित अध्यक्ष बद्री केसीले आफूहरूको निर्वाचनमा पराजित पक्ष प्रधानमन्त्री र परराष्ट्रमन्त्रीको नजिकका व्यक्ति रहेको बताएका छन् । शनिबार निर्वाचित भएको ९० दिन पुगेको अवसरमा आयोजित कार्यक्रममा उनले यस्तो बताएका हुन् ।

उनले निर्वाचनमा पराजित आरके शर्मा पक्ष प्रधानमन्त्री पुष्पकमल दाहाल ‘प्रचण्ड’ र परराष्ट्रमन्त्री नारायणप्रकाश साउदको नजिकको रहेको जिकिर गरे । गैरआवासीय नेपाली संघ गैरराजनीतिक अभियान रहेको उनले स्पष्ट पारे । एनआरएनएको २० वर्षे अवधिमा सबैभन्दा बढी ‘प्रोफेसनल’ र सचेतना अपनाएर आफूहरूले निर्वाचन गरेको उनको भनाइ छ ।

निर्वाचनअघिसम्म सबैले सहमति गरेको उनले बताए । निर्वाचनपश्चात् नतिजालाई स्वीकार्न नसक्दा विभिन्न आरोप लगाइएको उनले उल्लेख गरे ।

“...चुनावको बेलामा साँच्चिकै एकजना उपाध्यक्षको उमेदवारमा केही इरर आएको हो । तर, तत्काल नै भेरोभोटिङसँग इन्फरमेसन लिएर समाधान गरेका हौँ,” उनले भने, “अहिले निर्वाचित समिति एउटा मात्रै छ । देशमा जुनसुकै राजनीतिक पार्टीको सरकार आउन सक्छ, गैरआवासीय नेपाली भनेको गैरराजनीतिक अभियान हो । जात र धर्म, भाषाभन्दा माथिको अभियान हो । हामी सरकारलाई सघाउन चाहन्छौँ र सरकारबाट पनि त्यही अपेक्षा गरेका छौँ । जितेर आएको समितिलाई सरकारले सहयोग गरोस् ।”

विगत तीन महिनामा परोपकार, लगानी, संस्थागत विकासलगायत सकारात्मक काम र पहल गरिएको एनआरएनएले जनाएको छ । न्युज एजेन्सी नेपाल