काठमाडौं । यो साता चारदिन सेयर कारोबार भयो । जसमा दुई दिन घट्यो, दुई दिन बढ्यो । बजार बढ्दा उच्च अंकले बढ्यो, घट्दा सामान्य अंकले । दुई दिनमा सेयर बजार ८१ अंक बढेको छ । तर, दुई कारोबार दिनमा बजार २० अंक घटेको छ ।

गत साताको तुलनामा बजार ६६ अंकले बढेको छ । यो साता बजार २२ सय विन्दु पार गरेर तल झरेको छ । लगानीकर्तामा मनोवैज्ञानिक त्रास बढ्दा बजार अहिले २,१५५ को विन्दुमा छ । गत साता बजार २,०८९ को विन्दुमा बन्द भएको थियो ।

धितोपत्र दोस्रो बजारको कुल बजार पुँजीकरण ३४ खर्ब नजिक पुगेको छ । यस साताको अन्तिम कारोबार दिन बिहीबारसम्म धितोपत्र दोस्रो बजारको कुल बजार पुँजीकरण ३३ खर्ब ८६ अर्ब तीन करोड रुपैयाँ कायम भएको हो । 

गत साताको तुलनामा यो साता कुल बजार पुँजीकरण एक खर्ब चार अर्ब ९६ करोड रुपैयाँले बढेको नेपाल स्टक एक्सचेन्ज (नेप्से)को तथ्यांक छ ।  गत साताको अन्तिम कारोबार दिन कुल बजार पुँजीकरण ३२ खर्ब ८१ अर्ब सात करोड रुपैयाँ थियो ।

बजारमा उतारचढाव कायम रहे पनि कारोबार रकम भने बढ्दो क्रममा छ । गत बुधबार नौ अर्ब ७६ करोड रुपैयाँको सेयर कारोबार भएको थियो । तर, त्यसको भोलिपल्ट कारोबार रकम घटेर आठ अर्ब १७ करोड रुपैयाँ कायम भएको थियो ।

सन् २०२३ डिसेम्बरदेखि २०२४ जनवरी १८ सम्म ६ हप्ता सेयर कारोबार भएको छ । यी ६ कारोबार दिनमा पहिलो दुई हप्ता बजार बढेको छ भने त्यसपछिका दुई हप्ता घटेको छ । त्यस्तै पछिल्लो दुई हप्ता भने बजार बढेको छ ।

बजारको प्राविधिक पक्षलाई सुक्ष्मरूपमा विश्लेषण गर्दा बजार आगामी दिनमा बुलिस ट्रेडमा जाने देखिएको सेयर बजार विश्लेषक सुवासचन्द्र ढुंगाना बताउँछन् ।

“डिसेम्बर महिनादेखि अहिलेसम्म ६ हप्ता कारोबार भएको छ । त्यसमा पहिलो दुई हप्ता बजार हरियो, दुई हप्ता रातो र अहिले अन्तिम दुई हप्ता फेरि हरियो बनेको छ । तर, यसमा ग्रिन क्यान्डिलको साइज ठूलो र रेड क्यान्डिलको साइज सानो छ,” विश्लेषक ढुंगानाले भने, “भोलुम पनि बजार बढ्दा धेरै र घट्दा थोरै आएकोले मार्केटमा स्ट्रेन्थ छ भनेर बुझ्न सकिन्छ । गत हप्ता २ प्रतिशत र यो हप्ता ३ प्रतिशतले बजार बढेको देखिन्छ ।” 

बजारले गति लिएर अघि बढ्ने संकेत गरेसँगै यो क्षेत्रमा लगानी बढेको सेयर विश्लेषकहरू बताउँछन् । नयाँ लगानीकर्ताको प्रवेश पनि दोस्रो बजारमा बढिरहेको ब्रोकरहरू बताउँछन् ।

नयाँ ब्रोकरहरूको बजार प्रवेशसँगै नयाँ लगानीकर्ताहरूको संख्या बढ्दै गएको छ । धितोपत्र बजारमा लगानीयोग्य पुँजी जुटाउन सहज भइरहेको जानकारीसमेत लगानीकर्ताहरूले दिएका छन् । आफ्नो धितोपत्रमा भएको लगानीको मूल्य बढेसँगै सेयर धितोकर्जा थप्ने लगानीकर्ताको संख्यासमेत बढेको जानकारी बैंक तथा वित्तीय संस्थाहरूले दिएका छन् । लामो समयपछि निकै उत्साहित अवस्थामा लगानीकर्ता रहेको ब्रोकरहरू बताउँछन् ।

अबको हप्ता बजारले घट्दा २०२० र बढ्दा २२१५ विन्दुको सामना गर्नुपर्ने ढुंगाना बताउँछन् । “यो हप्ता क्यान्डिलको हाई विन्दु २,२१५ र लो विन्दु २०९३ छ । बजार केही समय यही रेन्जमा खेलेर माथि जान्छ भने यसको वृद्धि हुने सम्भावना धेरै हुन्छ,” उनले भने, “अब बुलिस सेन्टिमेन्ट बढ्नका लागि २२१५ माथि बन्द हुनुपर्ने देखिन्छ । एकपटक २२ सय विनदुलाई हिर्काएर फर्किएको र फेरि पनि २२ सयतिरै बजार फर्किन्छ । त्यसलाई तोड्छ भने पहिलेको बलियो २२ सयको रेसिडेन्स त्यसपछि सपोर्ट बन्न पुग्छ ।”  

यो साताको पहिलो कारोबार दिन ३१.६२ अंक, दोस्रो दिन ५४.५४ अंक बढेको बजार बन्द भएको थियो । त्यसपछिका दुई कारोबार दिन निरन्तर बजार घटेको छ । तेस्रो कारोबार दिन १२.१० अंक र चौथो तथा अन्तिम कारोबार दिन ७.२४ अंकले बजार घटेको हो ।

गत साताको तुलनामा यो साता बजार मापक नेप्से परिसूचक ३.२० प्रतिशत अर्थात ६६.८३ अंक माथि उक्लिएको छ ।

यो साताको चार कारोबार दिनमा ३१ अर्ब ४१ करोड ८२ लाख रुपैयाँको ९ करोड ४६ लाख २६ हजार कित्ता धितोपत्र कारोबार भएको छ । गत पाँच कारोबार दिनमा २५ अर्ब ४७ करोड ७५ लाख रुपैयाँको आठ करोड २५ लाख ३७ हजारभन्दा बढी कित्ता धितोपत्र कारोबार भएको थियो । गत साताको तुलनामा यो साता कारोबार रकम पाँच अर्ब ९४ करोड रुपैयाँभन्दा बढी र कारोबार कित्ता एक करोड २० लाख ८८ हजारको भएको हो ।

‘अन्य’ समूहका कम्पनीमा लगानीकर्ता झुमिए

गत साताको तुलनामा ‘अन्य’ समूहको परिसूचक यो साता सर्वाधिक ८.९३ प्रतिशत बढेको छ । जलविद्युत्‌को ६.०८ प्रतिशत, लघुवित्तको ४.२७ प्रतिशत, विकास बैंकको ३.४४ प्रतिशत र लगानीको २.८८ प्रतिशत परिसूचक वृद्धि भएको छ । 

त्यस्तै, वित्तको २.८६ प्रतिशत, बैंकिङको २.२७ प्रतिशत, म्युचुअल फन्ड समूहको ०.५९ प्रतिशत, निर्जीवन बिमा समूहको ०.४९ प्रतिशत, जीवन बिमा समूहको ०.४७ प्रतिशत र उत्पादन तथा प्रशोधन समूहको ०.२४ प्रतिशत परिसूचक बढेको छ । 

साता बढेको बजारमा होटल तथा पर्यटन समूहको परिसूचक १.८३ प्रतिशत र व्यापारिक समूहको परिसूचक १.३४ प्रतिशत घटेको छ ।