काठमाडौं । कप्तान विनोद भण्डारीको शतकप्रेरित त्रिभुवन आर्मी क्लबले प्रधानमन्त्री कप राष्ट्रिय क्रिकेट प्रतियोगितामा विजयी सुरुआत गरेको छ । सोमबार आफ्नो पहिलो खेलमा आर्मीले मधेस प्रदेशविरुद्ध १२६ रनको सहज जित निकालेको हो । 

कीर्तिपुरस्थित त्रिवि क्रिकेट मैदानमा आर्मीले प्रस्तुत गरेको ३२१ रनको लक्ष्य पछ्याउने क्रममा मधेसले ४८.४ ओभरमा सबै विकेट गुमाएर १९४ रन मात्र बनाउन सक्यो ।

मधेसका पवन सर्राफले ६५ रन जोडे । ओपनर मयन यादवले ३४, रुपेश सिंहले १८, विशाल पटेलले १७ र अनिल साहले १२ रन बनाए ।

मधेसलाई सस्तैमा समेट्न आर्मीका साहब आलमले चार विकेट लिए । १० ओभर बलिङ गरेका साहबले एक मेडन राख्दै ३७ रन मात्र खर्चिए । सोमपाल कामीले दुई, जितेन्द्र मुखिया र कुशल मल्लले समान एक विकेट लिए ।

त्यसअघि, विनोद भण्डारीले शतक बनाएपछि टस हारेर ब्याटिङमा उत्रिएको आर्मीले निर्धारित ५० ओभरमा सबै विकेट गुमाएर ३२० रन बनाएको थियो ।

विनोदले ९३ बलमा नौ चौका र ६ छक्कासहित ११३ रनको योगदान गरे । सन्तोष कार्कीले ४२, कुशल मल्ल र विवेक यादवले समान ३७ रन थपे । इमरान सेखले २६, भीम सार्कीले १८ र बसिर हमेदले १६ रन बनाए । 

मधेसका रञ्जित कुमारले पाँच विकेट लिए । रञ्जितले नौ ओभर बलिङ गर्दा ४१ रन मात्र खर्चिए । विशाल पटेलले दुई, रुपेश सिंह र राजेश यादवले समान एक विकेट लिए ।

जितसँगै दुई अंक जोडेको आर्मी अंकतालिकाको दोस्रो स्थानमा उक्लिएको छ । दुई खेलबाट दुई अंक जोडेको मधेस छैटौँ स्थानमा छ ।

सोमबारै सशस्त्र प्रहरी बलको एपीएफ क्लबले कर्णाली प्रदेशलाई ६ विकेटले हरायो । सुदूरपश्चिम प्रदेशले लुम्बिनी प्रदेशविरुद्ध पाँच विकेटको जित दर्ता गर्‍यो ।