काठमाडौं । विश्व नम्बर एक तथा साविक विजेता नोभाक जोकोभिचले वर्षको पहिलो ग्रान्डस्लाम अस्ट्रेलियन ओपनको पुरुष एकलमा विजयी सुरुआत गरेका छन् ।

आइतबार अस्ट्रेलियाको रोड लभेर एरिनामा भएको खेलमा जोकोभिचले छनोट खेलेर आएका डिनो प्रिज्मिकलाई ३–१ को सेटमा हराएका हुन् । सर्वियन टेनिस स्टार जोकोभिचले पहिलो सेट ६–२ ले सहजै जितेका थिए । तर, यसपछि दोस्रो सेटमा क्रोएसियाका १८ वर्षीय युवा प्रिज्मिकले ७–६ (७–५) ले आफ्नो पक्षमा पार्दै सनसनी मच्चाएका थिए । यसपछि तेस्रो र चौथो सेट ६–३ ६–४ ले जित्दै जोकोभिचले दोस्रो चरणमा स्थान पक्का गरेका हुन् ।

रोड लभेर एरिनामा दोस्रो चरण पुग्ने विजेताको छिनोफानो हुन कुल चार घण्टा एक मिनेट समय लागेको थियो ।

यस्तै, चौथो स्थानका जानिक सिनर र पाँचौँ स्थानका एन्ड्री रुभलेभ पनि प्रतियोगिताको दोस्रो चरणमा प्रवेश गरेका छन् ।

आइतबार रोड लभेर एरिनामै भएको खेलमा इटालीका सिनरले नेदरल्यान्ड्सका बोटिक भान डेन जान्डसोलाई ६–४ ७–५ ६–३ ले हराउँदा मार्गरेट कोर्ट एरिनामा रुभलेभले ब्राजिलका थिएगो सेबोट वाइल्डलाई पराजित गरे । 

आइतबार भएका अन्य खेलमा जित निकाल्दै स्पेनका जाउमे मुनर, अस्ट्रेलियाका क्रिस्टोफर ओ‘कोनेल, अमेरिकाका टेलर फ्रिट्ज, हंगेरीका फाबियन मारोज्सन, अर्जेन्टिनाका फ्रान्सिस्को केरुन्डोलो र नेदरल्यान्ड्सका जास्पेर डे जोङ पनि दोस्रो चरणमा प्रवेश गरे ।

यस्तै, महिला एकलमा साविक विजेता आर्यना साबालेन्का पनि दोस्रो चरण प्रवेश गरेकी छन् । साबालेन्काले पहिलो चरणको खेलमा छनोटबाट आएकी जर्मनीकी एल्ल सेइडेलको चुनौती ६–० ६–१ ले सहजै पन्छाइन् ।

ग्रिसकी मारिया साकारी दोस्रो चरणमा प्रवेश गरिन् । आठौँ स्थानकी साकारीले जापानकी नाओ हिबिनोलाई ६–४ ६–१ को सोझो सेटमा हराउँदै दोस्रो चरणमा स्थान निश्चित गरेकी हुन् ।