काठमाडौं । सत्तारुढ दल नेकपा (एकीकृत समाजवादी)ले पार्टीको विधान संशोधनका लागि पार्टीका तल्ला कमिटीहरूबाट सुझाव लिने भएको छ । 

एकीकृत समाजवादीको बुधबार बसेको सचिवालय बैठकले पार्टीको विधान संशोधनका लागि पार्टीका तल्ला कमिटीहरू र कार्यकर्ताबाट सुझाव संकलन गर्ने निर्णय गरेको हो । त्यसका लागि गत केन्द्रीय कमिटीको बैठकमा प्राप्त भएको सुझावका आधारमा बनेको विधान मस्यौदा प्रस्तावलाई जिल्लासम्म पठाउने र त्यसैको आधारमा सुझाव लिने प्रवक्ता जगन्नाथ खतिवडाले जानकारी दिए ।

जिल्लाबाट प्राप्त सुझावका आधारमा पुनः अर्को विधान मस्यौदा बनाएर आगामी माघको १४ र १५ गते बस्ने केन्द्रीय परिषद्को बैठकमा प्रस्तुत गरिने उनले जानकारी दिए । 

बैठकको निर्णय सुनाउँदै उनले भने, "आगामी माघ ११ गते हुने राष्ट्रियसभा निर्वाचनमा पार्टीका सम्पूर्ण शक्तिलाई यसैमा केन्द्रित हुन, व्यवस्थापन गर्न, प्रचार गर्न र गठबन्धनका उमेदवारहरूलाई जिताउनको निम्ति पार्टीले आह्वान गर्ने निर्णय गरेको छ । माघको १४ र १५ मा पार्टीको केन्द्रीय परिषद्को बैठक बस्दैछौँ । त्यसमा पार्टीको विधान संशोधनका विषयमा छलफल हुनेछ ।" 

बैठकले आगामी माघ ११ गते हुने राष्ट्रियसभा निर्वाचनमा पार्टीका सम्पूर्ण शक्तिलाई केन्द्रित गराउने निर्णय पनि गरेको छ । निर्वाचनको व्यवस्थापन, प्रचार र गठबन्धनका उमेदवारहरूलाई जिताउनको निम्ति आह्वान गर्ने निर्णय पनि गरेको प्रवक्ता खतिवडाले जानकारी दिए ।