काठमाडौं । चितवनको भरतपुर महानगरपालिका–१२ स्थित मिलनचोकको कल्भर्टमुनि गएको मंसिर ६ मा बोराभित्र दुईवटा शव भेटियो । जुटको बोराभित्र हात र खुट्टा बाँधी पोको पारेर फालिएको अवस्थामा फेला परेको शवको पहिचान गर्नै प्रहरीलाई हम्मेहम्मे पर्‍यो ।

शव फेला परेको करिब एक महिनासम्म पनि पहिचान हुन नसकेपछि चितवन प्रहरीले सुरुमा हुलिया र पछि स्केच नै बनाएर सार्वजनिक गर्‍यो ।

शवको प्रकृति हेर्दा उनीहरूको हत्या गरेर फालिएको भन्ने कुरामा शंका थियो । तर, चितवन प्रहरीलाई मानिस हराएको कुनै निवेदन र उजुरी नआएपछि अनुसन्धान गर्नै सकस पर्‍यो ।

घटना गम्भीर प्रकृतिको देखिएपछि प्रहरीको केन्द्रीय अनुसन्धान ब्युरो (सीआईबी)को टोली समेत चितवन पुगेर अनुसन्धानमा खटियो । सीआईबीकै टोलीले शव फेला परेको डेढ महिनापछि घटनाको पटाक्षेप गरेको छ ।

सीआईबीका एसपी नवराज अधिकारीका अनुसार मृतक भारतको विहार फुलबारीया, सुगौलीका १९ वर्षीय ऋषभकुमार कुशवाह र भारत मोतिहार संगावडिह सुगौली चम्पारणका ३० वर्षीय अस्मिता भन्ने सन्जुदेवी भएको खुलेको हो ।

उनीहरू दुवैजनाको हत्या भारत मोतिहारका ३३ वर्षीय अखिलेश भगतले गरेको सीआईबीको अनुसन्धानले देखाएको छ । भगतले उनीहरूको हत्या गरेको दुई हप्तापछि मात्रै चितवन छाडेका थिए । प्रहरीको अनुसन्धानका क्रममा भगतले मंसिर ३ गतेको राति उनीहरूको हत्या गरेको खुलाएको छ । 

हत्यालगत्तै भगतले राति १२ बजेर ४५ मिनेट जाँदा बोराभित्रको शव फालेको सीसीटीभी फुटेजबाट देखिएको थियो । पहिलो पटक बोराभित्रको शव कल्भर्टनजिक फालेर फर्किएका अखिलेशले पुनः राति १ बजेर १२ मिनेट जाँदा दास्रो शव समेत बोराभित्र साइकलमा नै राखेर फालेको देखिएको थियो ।

हत्या गरेर शव फालेको दुई हप्तासम्म पनि उनी चितवनमै बसेको खुलेको छ । प्रहरीको अनुसन्धानले उनी मंसिर १६ मा चितवन छाडेर भारत भागेको खुलेको हो ।

दसैँमा फलफूलको व्यापार गर्न आएका थिए अखिलेश
प्रहरीको अनुसन्धानका क्रममा अखिलेश र उनकी श्रीमती सन्जु दसैँपछि फलफूलको व्यापार गर्न भारतबाट चितवन पुगेका थिए । मृतक ऋषभकुमार भने यसअघिदेखि नै चितवनको मिलनचोकस्थित काकाको कोठामा बस्दै आएका थिए । अखिलेशले पनि उनीहरू बसेकैनजिक कोठा भाडामा लिएर फलफूलको व्यापार गर्न थाले ।

तर, श्रीमती सन्जु र ऋषभकुमारबीच अस्वभाविक सम्बन्ध हुन थाल्यो । त्यो चाल अखिलेशले पाइसकेका थिए । त्यही विषयमा अखिलेशले श्रीमतीलाई पटक–पटक कुटपिट समेत गर्थे । त्यसपछि पनि सन्जुको व्यवहार परिवर्तन भएन । मंसिर २ मा श्रीमती सन्जु र ऋषभकुमार आफ्नै कोठामा सँगै देखिएपछि अखिलेशले दुवैजनाको हत्या गरेको देखिएको प्रहरीले जनाएको छ ।

प्रहरीको अनुसन्धानले ऋषभकुमार नाताले अखिलेशका भतिजा पर्छन् ।

चितवनमा श्रीमतीको हत्या र भतिजाको हत्या गरेर भागेका अखिलेशले विहार पुगेर एकजनाको अपहरण समेत गरेको खुलेको सीआईबीका एसपी अधिकारीले बताए ।

उनलाई सोही आरोपमा विहार प्रहरीले पक्राउ गरी मोतिहारी कारागार चलान गरिएको छ ।