पाल्पा । राष्ट्रिय स्वतन्त्र पार्टीका सभापति रवि लामिछानेले मुलुकले परिवर्तनको आवाज खोजेको र नेपाली जनताले साथ दिए मात्र परिवर्तन सम्भव रहेको बताएका छन् ।

शनिबार पाल्पाको रामपुर नगरपालिकामा आयोजित पाल्पा खुला सभामा सम्बोधन गर्दै पूर्वगृहमन्त्री समेत रहेका सभापति लामिछानेले जुनसुकै मुद्दा लागे पनि अन्याय र अत्याचारविरुद्ध राष्ट्रिय स्वतन्त्र पार्टी लडिरहने बताए ।

“नेपाली जनताले हार्नु भएन, आँट गरेपछि निश्चित गन्तव्यमा पुग्नुपर्छ । मत परिवर्तन गरिएन भने देश परिवर्तन हुँदैन । विभेदको अन्त्यका लागि सधैँ लड्नेछौँ,” उनले भने ।

सांसद सुमना श्रेष्ठले राष्ट्रिय स्वतन्त्र पार्टी सबैको साझा पार्टी भएकाले जनताका मुद्दा, समस्यालाई संसद्‌मा उठाउँदै आइरहेको बताइन् । रासस