काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले सत्तासाझेदार दल नेपाली कांग्रेसभित्र आफूले चलखेल गर्न नचाहेको बताएका छन् ।

राष्ट्रिय एकता तथा मेलमिलाप दिवसको अवसर पारेर कांग्रेसले सोमबार काठमाडौंमा आयोजना गरेको एक कार्यक्रममा उनले सो पार्टीभित्र कुनै राजनीतिक तरंग ल्याउने इच्छा आफूमा नभएको बताएका हुन् ।

“अहिलेका राज्य सञ्चालनमा आफ्नो भूमिकासँग सन्तुष्ट रहेको नेपाली कांग्रेसको तलाउमा मैले एउटा ढुंगा फुत्त फाली दिएर कुनै तरंग ल्याउने मेरो इच्छा छैन,” उनले भने, “त्यसकारण म त्यतापिट्ट बिल्कुलै जान चाहन्नँ ।”

कांग्रेस सत्ताको अमनचैनमा रहेकाले त्यसमा खलल पार्न पनि आफूलाई मन नलागेको उनको भनाइ छ ।

‘देशलाई आवश्यक नभएको ठूल्ठूला भ्यु टावर बनाएको’ भन्ने कांग्रेस महामन्त्री विश्वप्रकाश शर्माको अभिव्यक्तिप्रति कटाक्ष गर्दै उनले ‘कांग्रेसको नीति एकतले घर मात्रै बनाउने हो ?’ भनी प्रश्न गरे ।

अध्यक्ष ओलीले बालकुमारी घटनामा भौतिक पूर्वाधार तथा यातायातमन्त्री प्रकाश ज्वाला जिम्मेवार रहेको बताए । मन्त्री ज्वाला पुगेपछि भीड उत्तेजित हुँदा प्रहरीको गोली लागेर दुई युवकको ज्यान गएको ओलीको भनाइ थियो ।

आफ्नो पार्टीले राष्ट्रियता, सुशासन, समृद्धि र विकासका प्रश्नमा राजनीतिक दलहरूसँग मेलमिलाप गरेर अघि बढ्न चाहेको उनले दोहोर्‍याए ।