काठमाडौं । इन्टरनेसनल ई–स्पोर्ट्स फेडेरेसन (आईईएसएफ)बाट नेपालका तीनजना प्रतिनिधिले रेफ्री लाइसेन्स पाएका छन् । 

वर्ल्ड ई–स्पोर्ट्स समिट २०२३ को अवसरमा दक्षिण कोरियाको बुसानमा हालै आयोजित वर्ल्ड ई–स्पोर्ट्स रेफ्री एकेडेमी–२०२३ मा नेपालका तीनजनाले सफलता हासिल गर्दै रेफ्री लाइसेन्स हात पारेका हुन् । 

आईईएसएफद्वारा भौतिक उपस्थितिमा पहिलो पटक आयोजित कार्यक्रममार्फत् रेफ्री लाइसेन्समा दुई दिने कक्षापछि भएको परीक्षामा नुवाकोटका क्षितिज श्रेष्ठ, अरुण मिश्र र सौजन्य श्रेष्ठले रेफ्री लाइसेन्स पाए । 

आईईएसएफको रेफ्री कोर्स उत्तीर्ण गर्ने उनीहरू पहिला नेपाली हुन् । अब उनीहरूले आईईएसएफ रेफ्री टायर २ को हैसियतमा ई–स्पोर्ट्सका प्रतियोगिता सञ्चालन गर्न पाउने छन् ।

उनीहरू नेपाल ई–स्पोर्ट्स एसोसिएसन (नेसा) को सिफारिसमा वर्ल्ड ई–स्पोर्ट्स रेफ्री एकेडेमी २०२३ मा सहभागी भएका थिए । अमेरिकाका जेम्स उड र पिटर स्टेन्सनी, कोरियाका ली सुङ वन तथा अर्जेन्टिनाका निकोलस क्रेस्पोले प्रशिक्षण दिएको वर्ल्ड ई–स्पोर्ट्स रेफ्री एकेडेमी २०२३ मा सात देशका २४ जना सहभागी भएका थिए ।

मोटर स्पोर्ट्सका मार्सल समेत रहेका क्षितिज बुद्धिचाल (चेस)का आर्बिटर (निर्णायक) पनि हुन् । अरुण र सौजन्य १९औँ एसियाली खेलकुद २०२३ मा ई–स्पोर्ट्सअन्तर्गत् ड्रिम थ्री किङडम २ को नेपाली टिमका खेलाडी हुन् ।