काठमाडौं । वीरगन्ज युनाइटेडले शनिबार पुछारको टोली बुटवल लुम्बिनीसँग १–० ले हार व्यहोरेसँगै नेपाल सुपर लिग (एनएसएल)को प्लेअफमा पुग्ने अवसर गुमाएको छ ।

दशरथ रंगशालामा जितले वीरगन्जले आफ्नो ‘डेब्यु’ सिजनमै प्लेअफ यात्रा तय गर्थ्यो । तर, वीरगन्ज ‘फिनिसिङ’मा चुक्यो र अन्तिम समयमा गोल व्यहोरेपछि साँघुरो हार व्यहोर्न बाध्य भयो ।

जितपछि बुटवल लुम्बिनी आठ खेलबाट १० अंकसहित पाँचौँ स्थानमा उक्लिएको छ । पराजित वीरगन्ज आठ खेलबाट आठ अंकसहित सातौँ स्थानमा यथावत् छ ।

खेलको पहिलो आक्रमण बुटवलले दशौँ मिनेटमा गरेको थियो । जिलेस्पीजंग कार्कीको प्रहार ‘डिफ्लेक्ट’ भएर बाहिरिएपछि बुटवल अग्रता लिन चुक्यो । एक मिनेटपछि नै वीरगन्जका ओबेदको बक्सबाहिरबाट प्रहार पोस्टको दिशामा हुन सकेन । १५औँ मिनेटमा जिलेस्पीको क्रस दीप कार्कीले सहजै रोके ।

लगत्तै वीरगन्जले पेनाल्टी अपिल गरे पनि रेफ्रीले अस्वीकार गरे । आन्द्रे बियिकले आफ्ना खेलाडी विलियम ओपोकुलाई लडाएको भन्दै वीरगन्जले पेनाल्टी अपिल गरेको थियो ।

२५औँ मिनेटमा सुशील लामाको कर्नर लुम्बिनीका गोलकिपर मोहमोडुले समात्न नसके पनि रेफ्रीले फउल दिएपछि खतरा टर्‍यो । ३०औँ मिनेटमा सुशील लामाको सट ब्लक भएपछि वीरगन्ज फेरि अग्रता लिन असफल भयो । पहिलो हाफको थप समयमा आशीष लामाको सट पोस्टबाट टाढा रह्यो । जिलेस्पीको क्रस नियन्त्रणमा लिएका उनी पोस्टको दिशामा राख्न असफल भएका हुन् । त्यससँगै पहिलो हाफ गोलरहित बराबरीमै रह्यो ।

दोस्रो हाफमा वीरगन्जले धेरै अवसर सिर्जना गरे पनि गोल गर्न सकेन । बुटवलले ५५औँ मिनेटमा अग्रता लिने प्रयास सफल हुन सकेन । बुटवलका आशीष लामाको सट बारमा लागेर फर्कंदा वीरगन्जका गोलकिपर दीपले नियन्त्रणमा लिए । लगत्तै वीरगन्जका सब्सिच्युट खेलाडी सुनील खड्काको सट पनि बारमा लागेर फर्कियो । लगत्तै बुटवलका गोलकिपर मोहमदुले क्लियर गरिदिए ।

लुम्बिनीका कप्तान एरिक विष्टले ७७औँ मिनेटमा गरेको प्रहार पनि गोलकिपर दीपले बचाए । तर, इन्ज्युरी समयमा चन्दन दासको गोलबाट बुटवलले अग्रता लियो । एरिकले पास नियन्त्रणमा लिँदै उनले वीरगन्जका गोलकिपर दीपसँग वान भर्सेस वानमा गोल गरेका हुन् । योसँगै वीरगन्ज पराजित भयो र प्लेअफमा पुग्ने लक्ष्य अधुरै बन्यो । न्युज एजेन्सी नेपाल