काठमाडौं । सर्वोच्च अदालतले स्वास्थ्य बिमा बोर्डका कार्यकारी निर्देशक डा. दामोदर बसौलालाई निलम्बन गर्ने निर्णय कार्यान्वयन नगर्न अन्तरिम आदेश जारी गरेको छ । शुक्रबार न्यायाधीशद्वय हरिप्रसाद फुयाल र सुनीलकुमार पोखरेलको संयुक्त इजलासले सरकारका नाममा अन्तरिम आदेश जारी गरेको हो ।

गएको असोज २४ गते मन्त्रिपरिषद्को बैठकबाट उनलाई निलम्बन गर्ने निर्णय गरिएको थियो । असोज २६ गते स्वास्थ्य तथा जनसंख्यामन्त्री मोहनबहादुर बस्नेतले डा. बसौलालाई तीन महिनाका निम्ति निलम्बन गरिएको पत्र पठाएका थिए ।

निर्देशक पदमा रहँदा बोर्डलाई हानि–नोक्सानी हुने काम गरेको र सोको प्रमाण नष्ट गर्न सक्ने भन्दै उनलाई निलम्बनको पत्र थमाइएको थियो । निलम्बनको निर्णयअघि मन्त्री बस्नेतले डा. बसौलालाई पदीय जिम्मेवारी वहन नगरेको भन्दै ११ बुँदे स्पष्टीकरण सोधेका थिए ।

निलम्बनको निर्णयविरुद्ध डा. बसौला कात्तिक १७ गते सर्वोच्चमा रिट दर्ता गराएका  थिए । “आफूविरुद्ध अन्याय भएको र निलम्बन कानुनसम्मत नभएको भनेर म कानुनी उपचारका लागि अदालत पुगेको थिएँ, त्यसैउपर आज मेरो पक्षमा आदेश आउँदा न्याय पएको महसुुस गरेको छु,” डा. बसौलाले बाह्रखरीसित भने ।

आउँदो आइतबारदेखि नै आफूले पुनः बोर्डको कार्यकारी निर्देशकको जिम्मेवारी सम्हाल्ने उनले बताए ।