काठमाडौं । सेयर बजार लगातार उकालो लगेपछि लगानीकर्ता नाफा बुक गर्नतर्फ लागेका छन् । आज कारोबारीहरू आफ्नो नाफा बुक गर्नतर्फ लाग्दा बजार घटेको छ । साताको अन्तिम कारोबार दिन आज बजार ३२.७७ अंक घटेर बन्द भएको छ ।

बजार घटे पनि २,१०० विन्दुको टेको लागेको छ । आज कारोबार रकम भने घटेको छ । बुधबार सात अर्बको सेयर कारोबार भएकोमा आज ६ अर्ब २७ करोड रुपैयाँको सेयर कारोबार भएको छ ।

आज पाँच कम्पनीको सेयर मूल्य १० प्रतिशतले वृद्धि भएको छ । बोटलर्स नेपाल (बालाजु), आशा लघुवित्त वित्तीय संस्था, धौलागिरि लघुवित्त वित्तीय संस्था, बीपीडब्लू लघुवित्त र छिमेक हाइड्रोपावरको सेयर मूल्य १० प्रतिशतले वृद्धि भएको हो ।

आज कारोबारमा आएका १३ समूहमध्ये उत्पादन तथा प्रशोधन र व्यापार समूहको परिसूचक वृद्धि भएको छ भने अन्य समूहको परिसूचक घटेको छ ।