काठमाडौं । त्रिभुवन विमानस्थलबाट १४ किलो सुनसहित पक्राउ परेका गोरखाका चन्द्रकुमार घले र मीनबहादुर घलेको समूहले एक क्वीन्टलभन्दा बढी सुन तस्करी गरेको खुलेको छ ।  उनले गत मंसिर २१ गते राति फ्लाई दुवईबाट आएका चन्द्र घलेले ज्याकेटभित्र लुकाएर १४ किलो सुन ल्याएका थिए । उनी विमानबाट ओर्लिनासाथ पक्राउ परेका थिए ।

त्यही दिन चन्द्रकुमारले सुन मीनबहादुर घलेको भएको र आफू भरिया मात्रै रहेको बयान प्रहरी र भन्सार कार्यालयका कर्मचारीलाई दिए । त्यही बयानका आधारमा मीनबहादुर समेत पक्राउ परेका थिए ।

उक्त तस्करी प्रकरणबारे अनुसन्धान गर्न त्रिभुवन विमानस्थल भन्सार कार्यालयले भन्सार प्रमुख उपसचिव मणिराम पौडेलको संयोजकत्वमा विमानस्थलका डीएसपी सूर्य सुवेदीसहितको ६ सदस्यीय छानबिन समिति गठन गरेको थियो ।

समितिको अनुन्धानका क्रममा चन्द्र घले समूहले एक क्वीन्टल भन्दा बढी सुन तस्करी गरेको खुलाएको हो । सुन तस्करीमा विमानस्थल सरसफाई कर्मचारीदेखि उड्डयन प्राधिकरण (क्यान) का कर्मचारीको समेत मिलोमतो रहेको छानबिनका क्रममा खुलेको छ ।

त्यसमध्ये ८ जना सरसफाइ कर्मचारी पक्राउ परेका छन् । 

त्यस्तै दुवईबाट सुन तस्करी गर्ने अर्का आरोपी स्याङ्जाका कृष्णकुमार श्रेष्ठलाई समेत पक्राउ गरिएको छ । दुबईबाट श्रेष्ठ र चन्द्र घलेले सुन विमानस्थलसम्म ल्याउने गरेको खुलेको छानबिन समितिका संयोजक उपसचिव मणिराम पौडेलले जानकारी दिए ।

उनका अनुसार, दुबईबाट तस्करीको सुन बोकेर त्रिभुवन विमानस्थलसम्म ल्याउने प्रमुख पात्र कृष्ण श्रेष्ठ र चन्द्र घले हुन् । त्यहाँबाट विमानस्थलकै सरसफाई कर्मचारीकै सहयोगमा सुन बाहिर ल्याउने गरेको देखिएको छ ।

चन्द्र घले र कृष्ण श्रेष्ठले पटक–पटक गरी क्वीन्टल भन्दा बढी सुन तस्करी गरेको समितिको दाबी छ । समितिको अनुसन्धानका क्रममा श्रेष्ठ र घलेले प्रत्येक पटक दुबईबाट १४ किलो नै ल्याउने गरेको आशंका गरेको छ । समितिको अनुसन्धानका क्रममा चन्द्र भन्दा कृष्ण श्रेष्ठले बढी सुन तस्करी गरेको देखिएको छ ।

उनी २०१९ देखि नै पटक–पटक दुबई काठमाडौं ओहोर–दोहोर गरेको खुलेको छ । श्रेष्ठले आफैंले पनि ७ पटक १४ किलोको दरले सुन दुवईबाट विमानस्थलसम्म ल्याएको स्वीकार नै गरेका छन् । हालसम्म सो प्रकरणमा ११ जना पक्राउ परेका छन् ।

जसमध्ये तस्करी गर्ने माथिल्लो तहका मिनबहादुर घले, कृष्णकुमार श्रेष्ठ र चन्द्र घले भएको खुलेको छ । त्यस्तै, पक्राउ परेका शेरबहादुर बस्नेत उड्डयन प्राधिकरणका सरसफाइ कर्मचारी र लेकबहादुर तामाङ कार्यालय सहयोगी हुन् ।

उनीहरूबाहेक समितिले विमानस्थलका सरसफाइ सुपरभाइजर सुशीला पाण्डे, सरसफाइ कर्मचारी मोहन चेपाङ र कपिल ओझालाई समेत नियन्त्रणमा लिइसकेको छ । अझै अनुसन्धान जारी छ । सुनका मालिक भारतीय रहेको र आफू सेटिङ मिलाउने भूमिकामा मात्रै सीमित रहेको दाबी मीनबहादुरको छ । 

अध्यागमन विभागको रेकर्ड अनुसार, चन्द्र घले २४ पटक काठमाडौं–दुबई ओहोर–दोहोर गरेको देखिन्छ भने कृष्णले श्रेष्ठ २६ पटक ओहोर–दोहोर गरेको पाइयो ।

उनीहरुले दुवईबाट सुन विमानस्थलको शौचालयमा राख्ने र त्यहाँबाट सरसफाई कर्मचारीले बाहिर पास गर्ने गरेको भेटिएको छ । त्यो काम एक पटक गरेबापत् उनीहरुले एक लाख रुपैयाँसम्म पाउने र संलग्न कर्मचारीले बाँडफाँड गरेर लिने गरेको समितिको दाबी छ ।

त्यस्तै दुवईबाट सुन तस्करी गर्ने श्रेष्ठ र घले ६० हजार तथा मिन घलेले एकलाख पाउने गरेको बयान समितिलाई दिएका छन् ।  पौडेलका अनुसार, चन्द्र घले र कृष्ण श्रेष्ठले दुवैले गरेर एक सय २४ किलो सुन तस्करी गरेको स्वीकार गरेको छन् । 

“हाम्रो छानबिनका क्रममा चन्द्र र कृष्णले कुल एक सय २४ किलो सुन तस्करी गरेको स्वीकार गरेका छन् । जसमा कृष्णले ९८ किलो र चन्द्रले २६ किलो गरेको बयान दिएका छन् । तर, यो भन्दा बढी गरेको देखिन्छ,” पौडेलले भने ।

छानबिन करिब अन्तिम चरणमा पुगेको र शुक्रबारसम्म प्रतिवेदन तयार गरिने उनको भनाइ छ । तस्करीको सुन भारत नै जाने गरेको समेत पौडलेको दाबी छ ।