काठमाडौं । सरकारले बेलायतमा रोजगारीका लागि नर्सहरूलाई मार्च तेस्रो साता पठाउने तयारी गरेको छ । सोहीअनुसार प्रक्रिया अघि बढाइएको वैदेशिक रोजगार विभागले जनाएको छ ।
बेलायत पठाउन पहिलो चरणमा ४५ जना नर्स अन्तर्वार्ताबाट छनोट भएका छन् । बेलायत सरकारबाट आएको सम्झौतापत्र छनोट भएका ४५ जनालाई पठाइएको विभागका इजरायल जापान शाखा निर्देशक गोपालराज तिमिल्सिनाले बताए ।
उनका अनुसार अबको प्रक्रियामा छनोट भएकाहरूको स्वास्थ्य परीक्षण हुनेछ । जसअन्तर्गत टीबी (क्षयरोग)को परीक्षण मात्र गरिनेछ । स्वास्थ्य परीक्षण र पुलिस रिपोर्ट बनेपश्चात विभागले नै भिसा प्रक्रिया अघि बढाउनेछ ।
यो सबै प्रक्रिया पुरा गर्न मार्च तेस्रो सातासम्म लाग्ने निर्देशक तिमिल्सिनाले बताए । बेलायत जान अन्तिम चरणमा छनोट भएका नर्सहरूलाई त्यहाँकै नेसनल हेल्थ सर्भिस फाउन्डेसन ट्रष्टले नै ओरेन्टेसन दिनेछ ।
बेलायत पुगेका नर्सहरूले पाँच वर्षसम्म ट्रष्ट अन्तर्गतका अस्पतालहरूमा सेवा दिनुपर्नेछ ।
