नेपाली कथानक चलचित्र ‘चित्रा’ यही पुस २७ गतेदेखि रिलिज हुँदै छ । बाबुछोरीको सम्बन्धको कथा भनेर प्रचार गरिएको सिनेमालाई घनश्याम लामिछानेले निर्देशन गरेका छन् । चलचित्रमा सन्तोष अधिकारी, अर्पण थापा, प्रमोद अग्रहरी, मेनुका प्रधान, शुभेच्छा खड्का, अन्जना बराइलीलगायत कलाकारको अभिनय छ । निर्देशक लामिछानेसँग गरिएको छोटो कुराकानी : 

‘चित्रा’ बाबु र छोरीको सम्बन्धको कथा भन्नुभएको छ, कस्तो सम्बन्ध हो ? 
एकल बुवाले छोरी कसरी हुर्काउँछ भन्ने कथा नै यो सिनेमाको मुख्य कथानक हो । छोरी जन्मिएदेखि ठूलो हुँदासम्म कसरी एउटा बुवाले छोरीलाई हुर्काउँछ त्यही नै यो चलचित्रको कथा हो । सामान्यतया बुवा र आमा भएर छोराछोरी हुर्काउने समाज हो हाम्रो । तर, बुवा एक्लैले कसरी हुर्काउँछ हामीले ‘चित्रा’मार्फत देखाउने प्रयास गरेका छौँ । बन्दै र उठाउँदै आएका विषयभन्दा फरक कथा यो सिनेमाले भन्नेछ ।

अक्सर तपाईं विषयप्रधान बनाउने मेकर, कन्टेनप्रधान सिनेमा बनाउनभन्दा चलाउन कठिन छ भनिन्छ नि ?
विषयप्रधान सिनेमा चल्दैनन् भन्दा पनि म्यासेज मात्रै छ भने त के हेर्नु भन्ने छ हाम्रो समाज । त्यसैले योपटक मैले विषयलाई जोड्दै कमर्सियल सिनेमा बनाएको छु । विषयलाई बजारसँग जोडेर बनाएको चलचित्र हो, ‘चित्रा’ । 

कमर्सियल बनाउने नाममा अनुहार बेच्न कलाकारको भीड जम्मा गर्नुभएको हो ?
त्यस्तो होइन । जिम्मेवार बुवाको कथा भन्ने सिनेमा हो । बुवाको कथा भन्ने भएपछि त्यसको समानान्तर कथा भन्न पनि त्यस्तै पात्र चाहिन्छ । त्यसैले कथा भन्न कलाकार चाहिएकाले धेरै भएजस्तो लागेको हो । कथाले मागेकाले कलाकार अनुबन्ध भएका हुन् । यो तथ्य सिनेमा हेरेपछि देखिने कुरा पनि हो ।

निर्मातालाई पैसाको लोभमा हिरो बनाउनुभयो भन्ने आरोप छ नि ?
यो आरोप मात्रै हो । उहाँ (सन्तोष अधिकारी) पहिलादेखि नै यो फिल्डमा हुनुहुन्छ । उहाँ निर्माता नै हो । थुप्रै म्युजिक भिडियोमा अभिनय पनि गरिसकेको कलाकार हो । म्युजिक भिडियोमा अभिनय गरेर अब सिनेमाका लागि तयार भएँ भनेर मात्रै आउनुभएको हो । त्यसैले पैसा लगाएरै हिरो बन्नुभयो भन्ने होइन । उहाँ चकलेटी हिरोका रोलमा आएको भए पनि यो आरोप लगाउन मिल्थ्यो होला, बुवाको भूमिकामा हुनुहुन्छ । त्यसैले पनि यो टिप्पणी मात्रै हो । 

लगानी नगरेको भए तपाईंले उहाँलाई ‘चित्रा’मा लिनुहुन्थ्यो ? 
उहाँको विकल्प नै थिएन भन्ने होइन । तर, उहाँको सम्भावना पनि उत्तिकै रहन्थ्यो । तपाईंले भनेजस्तो पैसा लगानी गरेकै बलमा पहिलोपटक डेब्यु गरेको भए उहाँको सम्भावना पक्कै हुँदैन थियो । तर, उहाँ अभिनय गरिसकेको कलाकार भएकाले सम्भावना रहन्थ्यो ।

जाडो मौसममा चलचित्र चल्दैन भन्ने हल्ला सिनेवृत्तभित्रै छ, यही समय किन रोज्नुभयो ?
राम्रो भयो भने जाडोले हलसम्म जान रोक्छ भन्ने लाग्दैन । अहिले मल्टिप्लेक्समा एसीको तातोमा बसेर आरामले चलचित्र हेर्न सकिन्छ । सिंगल थिएटर हुँदा जाडोले केही असर गर्थ्यो होला, तर अहिले छैन ।

अर्को कुरा, माघे संक्रान्ति सिनेमा रिलिजका हिसाबले राम्रो डेट हो । बिदा भएकाले दर्शक सिनेमा हेर्न जानुहुन्छ भन्ने छ । त्यसैले हामीले राम्रो डेट पाएका छौँ भन्ने हाम्रो विश्वास छ ।