काठमाडौं । चौधरी ग्रुप अन्तर्गतको दूरसञ्चार कम्पनी सीजी टेलिकमको लाइसेन्स खारेज भएको छ ।

वि.स.२०६० सालमा सीजी टेलिकमले ग्रामीण दूरसञ्चार सेवा सञ्चालनका लागि नेपाल दूरसञ्चार प्राधिकरणबाट अनुमतिपत्र (लाइसेन्स) पाएको थियो ।

सोही लाइसेन्स नवीकरणका लागि समयमै आवेदन नदिँदा कम्पनीको लाइसेन्स स्वतः खारेज भएको हो । दूरसञ्चार ऐन, २०५३ को दफा २५ को उपदफा ५ अनुसार सीजी टेलिकमको अनुमतिपत्र स्वतः खारेज भएको हो ।

प्राधिकरणका एक अधिकारीले नवीकरणका लागि मसिंर १६ गतेसम्मको अन्तिम अवधि सकिएसँगै सीजी टेलिकमको लाइसेन्स खारेज भएको बताएका छन् ।

ग्राहक र सेवालगायत कुनै कार्य सञ्चालनमा नरहेका कारण यसअघि नै पनि सीजी टेलिकमको लाइसेन्स नवीकरण गर्ने/नगर्ने विषयलाई नियामक निकाय अन्यौलमा थियो ।

प्राधिकरणका ती अधिकारीले त्यतिबेला केही ग्राहक देखाएर लाइसेन्स नवीकरण गरेको र अहिले भने सीजी टेलिकमले चाहे भए पनि लाइसेन्स नवीकरण हुने आधार न्यून रहेको बताएका छन् । अहिले सीजीले आधारभूत टेलिफोन सेवाको लाइसेन्स लिन चाहेको छ ।

बढीमा २५ वर्षको अवधि हुने लाइसेन्स एक पटक १० वर्षको अवधिका लागि मात्रै दिइने व्यवस्था दूरसञ्चार ऐन, २०५३ मा छ । उक्त लाइसेन्स बढीमा पाँच वर्षका लागि मात्रै नवीकरण मिल्ने व्यवस्था समेत ऐनमा छ ।

सीजी टेलिकमको लाइसेन्स करिब तीन महिनाअघि नै सकिएको थियो । अहिले जरिवानासहित नवीकरण गर्न मिल्ने थप अवधि पनि सकिएको हो । अब, भने सीजीले चाहेर पनि लाइसेन्स पुर्नस्थापित हुने सम्भावना नरहेको प्राधिकरणका ती अधिकारीको दाबी छ ।

प्राधिकरणको यो निर्णयमाथि चित्त नबुझे सञ्चार तथा सूचना प्रविधि मन्त्रालयमा लाइसेन्स नवीकरणका लागि पुनरावेदनमा जान मिल्ने व्यवस्था छ । तर, यो व्यवस्था लाइसेन्स वहालबालाको हकमा मात्रै भएका कारण सीजीको हकमा यो सम्भव नहुने प्राधिकरणका ती अधिकारीको भनाइ छ ।

सीजी टेलिकमले मसिंर १६ गते भन्दा अघिल्लो मितिमा नवीकरण शुल्क करिब ९० हजार रुपैयाँ बुझाएको भौचर र नवीकरणका लागि आवेदन दिइसक्नु पर्ने थियो । तर, त्यसो नगरेसँगै उसको लाइसेन्स स्वतः खारेज भएको हो ।