काठमाडौं । डोनाल्ड टस्कले पोल्यान्डको नयाँ प्रधानमन्त्रीका रूपमा शपथग्रहण गरेका छन् । टस्कले बुधबार वार्सास्थित राष्ट्रपति भवनमा पोल्यान्डको प्रधानमन्त्रीका रूपमा शपथग्रहण गरेका हुन् ।

टस्कलाई सोमबार तथाकथित दोस्रो संवैधानिक चरणमा पोल्यान्डको संसद्को तल्लो सदन सेज्मले प्रधानमन्त्रीका रूपमा निर्वाचित गरेको थियो । राष्ट्रपति डुडाले बधाई दिँदै सफल कार्यकालको शुभकामना दिए ।

मंगलबार सेज्मले टस्कको मन्त्रिपरिषद्लाई विश्वासको मत दिएको थियो । उपप्रधान एवं रक्षामन्त्री व्लाडिस्लाव कोसिनियाक–कामिस्ज र उपप्रधान एवं डिजिटाइजेसनमन्त्री क्रिजिस्टोफ गावकोस्कीले पनि शपथ लिएका छन् ।

कुनै समय रक्षा र परराष्ट्रमन्त्री भइसकेका राडोस्लाव सिकोर्सकीले फेरि परराष्ट्र मन्त्रालयको नेतृत्व गर्नेछन् । पूर्वलोकपाल एडम बोडनारले न्याय मन्त्रालय र अभियोजकको कार्यालयको नेतृत्व गर्नेछन् ।

मंगलबार संसद्मा प्रमुख नीतिगत भाषणका क्रममा टस्कले सार्वजनिक क्षेत्रको तलब बढाउने र वार्सा र ब्रसेल्सबीचको कानुनी शासन विवादका कारण रोकिएको युरोपेली संघबाट ५९.८ बिलियन युरो (६४.५ बिलियन अमेरिकी डलर) अनुदान र ऋणमा रोक लगाउने प्रतिबद्धता व्यक्त गरे ।

६६ वर्षीय टस्क सन् २००७ देखि २०१४ सम्म पोल्यान्डको प्रधानमन्त्री र २०१४ देखि २०१९ सम्म युरोपियन काउन्सिलको अध्यक्ष भइसकेका छन् । सिन्ह्वा/न्युज एजेन्सी नेपाल