काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले गठबन्धनको सरकारले साम्प्रदायिक पक्षलाई भित्रभित्रै बढवा दिएको आरोप लगाएका छन् ।

पार्टीको संकल्पयात्राअन्तर्गत मंगलबार ओखलढुुंगाको हर्कपुरमा आयोजित सभामा उनले एमालेले मात्र सामाजिक न्याय र समानता कायम गर्ने जिकिर गरे ।

“अहिलेको गठबन्धन सरकार साम्प्रदायिकताको जगमा उठेको । त्यसकारण अहिले पनि साम्प्रदायिकताको पक्षलाई भित्रभित्र बढवा दिएर चलिरहेको अवस्था छ,” उनले भने, “एमालेले मात्रै सामाजिक न्याय र समानता कायम गर्ने र त्यस आधारमा सामाजिक सद्भाव र सामाजिक सद्भावका आधारमा राष्ट्रिय एकता कायम गर्ने ।”

ओलीले पहिचानवादी पक्षधरको आन्दोलनप्रति लक्षित गर्दै भावनामा बगेर देश नबन्ने बताए । जनताका बीचमा फाटो ल्याउन नहुने उनको भनाइ छ ।

“भावनामा बग्न हुँदैन । हाम्रा दाजुभाइ, दिदीबहिनीहरू अनावश्यक भावनामा बगेका छन् भने त्यस्ता भावनाले देश बन्दैन । देश बनाउनका लागि बलियो राष्ट्रिय एकता, समझदारी चाहिन्छ,” उनले भने, “जनताका बीचमा फाटो ल्याउने होइन । जनताका बीचमा राष्ट्रिय एकता बनाउने हो ।”

राजनीतिक रूपमा मतभेद भए कानुनी प्रक्रियाबाट समाधान गर्नुपर्नेमा उनले जोड दिए । शान्तिपूर्ण बाटोबाट समस्या समाधान गर्न उनको आग्रह छ ।

“राजनीतिक मतभेद हुनसक्छ । ती मतभेदको समाधन गर्ने वैधानिक प्रक्रिया छन् । कानुनी प्रक्रियाबाट, शान्तिपूर्ण बाटोबाट, आवेश–उत्तेजनामा होइन,” कार्यक्रममा ओलीले भने, “सँगै बसेर छलफलबाट ती कुराहरूको औचित्य पुष्टि गर्नुपर्दछ । त्यस औचित्यको आधारमा समस्या समाधान गर्नुपर्दछ ।”

एकताबद्ध भएर राष्ट्र निर्माणको काम गर्न उनले अपिल गरे । “हामी एकताबद्ध भएर राष्ट्र निर्माणको काममा अघि बढौँ,” उनले भने ।

एमालेले एकल बहुमत नल्याए विकास र समृद्धि हुन नसक्ने भएकाले ‘मिसन ०८४’ को कुरा गरिएको उनको भनाइ छ । “मिसन ०८४ एमालेको लागि भनेको होइन । एकल बहुमत । एमालेको एकल बहुमतबिना न विकास ल्याउन सकिन्छ न देश समृद्ध बनाउन सकिन्छ,” उनले भने ।