काठमाडौं ।ट्रेन्ट एलेजान्डर–अर्नाल्डको निर्णायक गोलप्रेरित लिभरपुलले फुलहमविरुद्ध ४–३ को रोमाञ्चक जित निकालेको छ । आइतबार राति घरेलु मैदान एन्फिल्डमा तीन मिनेट बाँकी रहँदा दुई गोल गरेपछि लिभरपुलले फुलहमविरुद्ध तीन अंक सुनिश्चित गरेको हो ।

खेलको ८६ मिनेटसम्म लिभरपुल ३–२ ले पछि परेको थियो । तर, अन्तिम तीन मिनेटमा दुई गोल गर्दै लिभरपुलले सनसनीपूर्ण जित निकाल्यो । 

खेलको २०औं मिनेटमा फुलहमका बेर्नड लेनोबाट भएको आत्मघाति गोलबाट लिभरपुलले अग्रता बनाएको थियो । तर, २४औं मिनेटमा ह्यारी विल्सनले गोल गर्दै पाहुना टिमलाई खेलमा फर्काएका थिए । 

३८औं मिनेटमा एलेक्सिस म्याक एलिस्टरले गोल गर्दै पुनः लिभरपुललाई अग्रता दिलाएका थिए । एलिस्टरले करिब ३५ यार्ड परबाट बललाई जालीको दिशा दिएका थिए । 

पहिलो हाफको इन्जुरी समयमा केनी टेटाले गोल गर्दै पुनः फुलहमलाई खेलमा फर्काएका थिए । 

८०औं मिनेटमा बोबी रेइडले गोल गर्दै फुलहमलाई अग्रतामा राखेका थिए । तर, ८७औं मिनेटमा वाटारु एन्डोले गोल गर्दै लिभरपुललाई खेलमा फर्काएका थिए । त्यसको अर्को मिनेटमा अर्नोल्डोले गोल गरेपछि लिभरपुलले ४–३ को अग्रता बनायो । यही गोल निर्णायक बन्दा लिभरपुलले रोमाञ्चक जितसहित तीन अंक निश्चित गर्यो । 

जितसँगै १४ खेलबाट ३१ अंक जोडेको लिभरपुल तालिकाको दोस्रो स्थानमा उक्लिएको छ । समान खेलबाट १५ अंक जोडेको फुलहम तालिकाको १४औं स्थानमा छ । 

आइतबार राति नै भएको अर्को खेलमा म्यानचेस्टर सिटी टोटनहमसँग ३–३ को बराबरीमा रोकिएको छ । 

बराबरीमा रोकिएको साविक विजेता सिटी १४ खेलबाट ३० अंकसहित तालिकाको तेस्रो स्थानमा छ । समान खेलबाट २७ अंक जोडेको टोटनहम तालिकाको पाँचौ स्थानमा छ ।