काठमाडौं । बालिकाहरूलाई यौन क्रियाकलापमा लगाएको आरोपमा एक महिला पक्राउ परेकी छन् । तनहुँको भिमाद नगरपालिका–२ की २५ वर्षीया सपना तामाङ भनिने पूजा रानालाई प्रहरीले नियन्त्रणमा लिएको हो ।

यही मंसिर १४ गते उनलाई काठमाडौंको नयाँ बसपार्कबाट पक्राउ गरिएको नेपाल प्रहरीको मानव बेचबिखन अनुसन्धान ब्युरोले जनाएको छ ।

बालिकाहरूलाई विभिन्न प्रलोभनमा पारी नयाँ बसपार्क र कलंकीस्थित विभिन्न होटेल तथा गेस्टहाउसहरूमा यौन गतिविधिमा लगाएको उनीमाथि आरोप छ । त्यस्तो क्रियाकलापमा लगाइएका तीन बालिकाको उद्धार समेत गरिएको ब्युरोका प्रवक्ता एवं एसपी कृष्णप्रसाद पगेनीले जानकारी दिए ।

रानाविरुद्ध मानव बेचबिखन तथा ओसारपसार मुद्दामा काठमाडौं जिल्ला अदालतबाट पाँच दिनको म्याद थप गरी अनुसन्धान भइरहेको ब्युरोले जनाएको छ ।

आर्थिक अवस्था कमजोर भएका, ग्रामीण भेगका कम पढेलेखेका बालिकाहरूलाई धागो कात्ने, घरहरूमा बच्चा हेर्ने, होटेलमा सरसफाइको काममा लगाइदिने भन्दै उनले काठमाडौंमा बोलाउने गरेको प्रहरी अनुसन्धानका क्रममा खुलेको छ ।

त्यसरी बोलाइएका बालिकाहरूलाई बसपार्क र कलंकीस्थित विभिन्न होटेल तथा गेस्टहाउसहरूमा राख्ने गरेको खुलासा भएको ब्युरोले जनाएको छ ।

बालिकाहरूलाई विगत १० महिनादेखि विभिन्न डरत्रास देखाई शारीरिक सम्पर्क राख्न बाध्य पार्ने गरेको खुलेको एसपी पगेनीले जानकारी दिए ।

प्रहरीसहितको टोलीले कलंकीबाट एक र नयाँ बसपार्कबाट दुई गरी तीन बालिकाको उद्धार गरिएको थियो । उद्धार गरिएका बालिकाहरूलाई सुरक्षित आवासमा राखिएको छ ।

घटनामा संलग्न अरू व्यक्तिहरूको खोजी र थप अनुसन्धान कार्य भइरहेको ब्युरोले जनाएको छ ।