रुपन्देही । नेपाली कांग्रेसका नेता डा. शेखर कोइरालाले आउँदो निर्वाचनमा पार्टीले एक्लै प्रतिस्पर्धा गर्नुपर्ने बताएका छन् । यसका निम्ति अहिलेदेखि नै तयारी थाल्न उनले कांग्रेसका नेता–कार्यकर्तालाई आग्रह पनि गरे ।
शनिबार बुटवलमा कांग्रेस लुम्बिनी प्रदेश समितिको प्रथम सम्मेलनमा उनले कांग्रेस एक्लै चुनाव लड्न एक ढिक्का हुनुपर्नेमा जोड दिए । उनले कांग्रेस एक ढिक्का भए कसैको सहारा लिनु नपर्ने पनि बताए ।
कांग्रेस परिवर्तन भए मात्र राष्ट्र परिवर्तन हुने उनले उल्लेख गरे । कांग्रेस परिवर्तन हुन नेताहरूले त्याग गर्न सक्नुपर्नेमा उनले जोड दिए ।
मुलुकमा भ्रष्टाचार र दण्डहीनता बढेको बढ्यै अवस्था रहेको भन्दै नेता कोइरालाले सुशासन र पारदर्शिता कायम नभएसम्म कांग्रेसले विश्राम लिन नहुने बताए ।
उनले कृषि उत्पादन बढाउन सके मात्र रोजगारी सिर्जना र आत्मनिर्भर अर्थतन्त्र हुने भन्दै युवा पलायन रोकेर स्वदेशमै कमाउने वातावरण बनाउनेतर्फ सबैको ध्यान जानुपर्ने बताए ।
कांग्रेस केन्द्रीय सदस्य चन्द्रकान्त भण्डारीले पार्टी बनाउन युवाको साथ लिनुपर्ने बताए । उनले गुटबन्दीका कारण संगठन वा देश नबन्ने औँल्याए । गुटको पछिभन्दा पनि संगठन वा देशका निम्ति काम गर्न उनले नेतृत्वलाई आग्रह गरे । रासस
