काठमाडौं । नेपाल सुपर लिग (एनएसएल)को दोस्रो संस्करणमा शनिबारका दुवै खेल बराबरीमा सकिएका छन् ।

शनिबारको पहिलो खेलमा झापा एफसी र पोखरा थन्डर्सले १–१ को बराबरी खेल्दै अंक बाँडे । त्रिपुरेश्वरस्थित दशरथ रंगशालामा भएको खेलमा पोखराले १९औँ मिनेटमा मोसेस त्वमको गोलबाट अग्रता बनाएको थियो । तर, इन्ज्युरी समयमा समन्दर ओकिलोभको गोलमा झापा एफसी खेलमा फर्किएको थियो ।

यस्तै, दिनको दोस्रो खेलमा धनगढी एफसी र ललितपुर सिटी एफसीले गोलरहित बराबरी खेल्दै अंक बाँडे ।

यही मंसिर ८ गतेदेखि सुरु भएको प्रतियोगितामा नौ टिमको सहभागिता छ । काठमाडौं रेजर्स, धनगढी एफसी, बुटवल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगन्ज एफसी, ललितपुर सिटी एफसी, बुटवल लुम्बिनी र पोखरा थन्डर्स प्रतियोगितामा सहभागी छन् ।

प्रतियोगिताका सबै खेल त्रिपुरेश्वरस्थित दशरथ रंगशालामा हुनेछ । एनएसएलको पहिलो संस्करणको उपाधि काठमाडौं रेजर्सले जितेको थियो ।

आयोजक नेपाल स्पोर्ट्स एन्ड इभेन्ट म्यानेजमेन्टले प्रतियोगिताका निम्ति साधारण प्यारापिटतर्फ २०० र विशिष्टतर्फ ५०० रुपैयाँ प्रतिटिकट मूल्य तोकेको छ ।