काठमाडौं । दूरसञ्चार क्षेत्रको नियामक निकाय नेपाल दूरसञ्चार प्राधिकरणले एनसेलको सेयर किनबेच भएको विषयमा ध्यानाकर्षण भएको बताएको छ ।

एनसेलको ८० प्रतिशत सेयरसहितको स्वामित्व भएको मलेसियन कम्पनी आजियाटा ग्रुप बर्हाडले उक्त सेयर स्वामित्व बेचेको भन्दै विज्ञप्ति जारी गरेको छ ।

त्यसपछि प्रकाशित समाचारहरूप्रति ध्यानाकर्षण भएको प्राधिकरणले बताएको हो ।

"त्यस कम्पनीको सेयर बिक्री तथा हक हस्तान्तरण गर्न लागिएको भनी विज्ञप्ति प्रकाशित भएको देखिएको र यस विषयलाई लिएर विभिन्न सञ्चार माध्यमहरूमा समाचार समेत प्रकाशित भइरहेको विषयमा प्राधिकरणको ध्यानाकर्षण भएको छ," प्राधिकरणले भनेको छ ।

दूरसञ्चार नियमावली, २०५४ को नियम १५ ९ट० बमोजिम चुक्ता पुँजीको पाँच प्रतिशतभन्दा बढी सेयर खरिद वा बिक्री गर्नुअघि प्राधिकरणको स्वीकृति लिनुपर्ने व्यवस्था रहेको छ । 

प्राधिकरणले आजियाटालाई सोही अनुसार गर्न भन्दै पत्राचार गरेको हो । पत्रमा प्राधिकरणले कम्पनी रजिस्टारको कार्यालयलाई समेत बोधार्थ उल्लेख गरेको छ ।

प्राधिकरणका एक अधिकारीले अहिलेसम्म कुनै पनि कम्पनी सेयर खरिद बिक्री गर्ने अनुमति लिन नआएको बताएका छन् ।

आजियाटाले स्विडिस दूरसञ्चार कम्पनी टेलिया सोनेराबाट सन् २०१६ मा एक अर्ब ३६ करोड अमेरिकी डलरमा एनसेलको ८० प्रतिशत सेयर किनेको थियो । अहिले सोही सेयर पाँच करोड अमेरिकी डलरमा बिक्री गरेपछि कर छल्ने प्रपञ्च भएको भन्दै टीकाटिप्पणी हुन थालेको छ ।

एनसेलको ८० प्रतिशत सेयर सतिशलाल आचार्यको बेलायतमा रहेको एक कम्पनीले खरिद गरेको हो ।  आचार्य सिंगापुरमा बस्ने नेपाली व्यवसायी हुन् । यसअघि उनको स्वामित्त्वमा एनसेलको २० प्रतिशत सेयर रहेको थियो ।

आजियाबाट एनसेलको सेयर आचार्यको नेतृत्वमा बेलायतमा रहेको कम्पनी स्पेक्ट्रलाइट युकेले खरिद गरेको बताइएको छ । उक्त कम्पनी आचार्य र डेन्टन्स सेक्रेटरिज लिमिटेडको संयुक्त स्वामित्त्वमा छ ।