काठमाडौं । कुनै बेला ‘लिटिल बुद्ध’ भनी प्रचारित तपस्वी रामबहादुर बम्जन करिब पाँच वर्षदेखि गुमनाम छन् । 

‘उनी कहाँ छन् र के गर्दैछन् ?’ देशको अन्तरिक सुरक्षाको जिम्मा पाएका राष्ट्रिय अनुसन्धान विभागका गुप्तचर र अपराध अनुसन्धान गर्ने प्रहरीलाई अत्तोपत्तो छैन । उनीमाथि आश्रम आएका तीन ‘भक्त’ बेपत्ता पारेको आरोप छ । त्यही प्रकरणपछि उनी गुमनाम भएका हुन् ।

उनी सम्पर्कविहीन भएपछि उनको खोजीमा प्रहरीको केन्द्रीय अनुसन्धान ब्यूरो (सीआईबी) को टोली ४ असार २०७७ मा तालिम प्राप्त कुकुरसहित सिन्धुलीको आश्रम पुगेको थियो । तर, त्यो बेलासमेत प्रहरी रित्तो हात फर्किन बाध्य भयो ।

सीआईबीबाहेक सिन्धुली प्रहरी र सर्लाही प्रहरीसमेत उनको खोजीमै छ ।  बम्जनले सिन्धुलीको कमलामाई नगरपालिका– ८, पैरेनीस्थित २० रोपनीभन्दा बढी क्षेत्रफलभित्र सुविधासम्पन्न आश्रम बनाएका छन् । 

आश्रमभित्र आफ्ना लागि छुट्टै दरबार समेत निर्माण गरेका थिए ।

बम्जनको आश्रममा छिरेका प्रहरी अधिकारीका अनुसार, उनले आफ्ना लागि आश्रमभित्र स्वीमिङ पूल, जिमखानादेखि अन्य धेरै निजी सुविधा सम्पन्न हल निर्माण गरेका थिए । आश्रमका चारै नाकामा उनले निजी सुरक्षा चेक पोस्टसमेत राखेका थिए । 

उनी हराएपछि प्रहरीले उनको आश्रममा छापा मारेको छैन ।  यद्यपि उनको खोजी अझै जारी रहेको सीआईबीका एसएसपी दिनेश आचार्यले जानकारी दिए ।  “हामी खोजीमै छौं । तर, फेला परेका छैनन् । पछिल्लो समय उनको ‘मुभमेन्ट’ सिन्धुलीको आश्रमभित्र पनि देखिएको छैन,” एसएसपी आचार्यले भने ।

बम्जनमाथि २० साउन २०७३ मा आश्रममा आएका तीन युवतीलाई प्रलोभनमा पारेर यौनशोषण र बलात्कारपछि बेपत्ता गरेको आरोप छ । त्यही आरोपको तीन वर्षपछि सर्लाही प्रहरीमा पीडितका परिवारले किटानी जाहेरी दिएका थिए । 

जाहेरीपछि पनि पक्राउ नपरेका बम्जनलाई जिल्ला अदालत सर्लाहीले हाजिर हुन भन्दै त्यहीबेला ३५ दिने म्यादसमेत दिएको थियो । तर, म्याद नाघ्दा पनि बम्जन अदालतमा हाजिर भएनन् । 

सर्लाही अदालतले २०७६ माघमा पहिलो पटक उनीविरुद्ध पक्राउ पुर्जी जारी गरेको थियो । प्रहरीले २१ असार २०७७ मा उनीविरुद्धको अनुसन्धान प्रतिवेदन सर्लाही जिल्ला वकिल कार्यालय हुँदै जिल्ला अदालत टेकाइसकेको छ । तर, बम्जन अझै अदालतमा समेत हाजिर भएका छैनन् ।

प्रहरीले बम्जनका आश्रमहरुबाट यसअघि शब गलाउन प्रयोग गरिएका नुनका ढिकाहरू बरामद गरेको थियो ।  बम्जनमाथि सर्लाही, नुवाकोट र मकवानपुरबाट आश्रम आएका तीन युवतीलाई बलात्कार गरेको आरोप लागेको छ ।

बम्जनबारे सुरुवाती चरणको अनुसन्धान गरेका सीआईबीका एक अधिकारीले भने बम्जनले सिन्धुलीको आश्रम अझै नछोडेको दाबी गरे । 

ती अधिकारीले भने, “सिन्धुलीको आश्रम छाडेर बम्जन अन्त जान्छन् जस्तो लाग्दैन । त्यहाँभित्र उनको छुट्टै राज्य छ । गैरकानुनी हिसाबले सरकारले नै संरक्षण गरेको छ । अवैध बिजुलीदेखि यातायात र वन नै फडानी गरेर बसेका छन् ।”

सीआईबीको टोलीले बम्जनको आश्रम भत्काउनुपर्ने प्रतिवेदन जिल्ला वन कार्यालय सिन्धुलीदेखि तत्कालीन सिन्धुलीका प्रहरी प्रमुख एसपी रञ्जु सिग्देललाई दिएको थियो । तर, त्यो कुनै प्रक्रिया अघि बढेन ।

हाल सिन्धुली प्रहरी प्रमुखमा एसपी राजकुमार सिलवाल छन् ।  उनले पनि बम्जनबारे खोजी जारी रहे पनि नभेटिएको बाह्रखरीलाई बताए । 

“हामीले पनि खोजी कार्य जारी नै राखेका छौँ । तर, भेटिएका छैनन् । तीन महिनाअघि मात्रै हाम्रो टोलीले आश्रममा छापा मारेको थियो भेटिएनन्,” एसपी सिलवाले भने । आश्रमभित्र बम्जन बस्ने कोठाहरु भत्किन र ढुसी देखिएको प्रहरीले जनाएको छ । सीआईबीले बम्जनविरुद्ध बालबालिकासम्बन्धी ऐन, २०७६ अनुसार १४ वर्ष जेल सजायको माग राखेर प्रतिवेदन पेस गरेको थियो ।

जसमा बम्जनसहित उनका सहयोगी ज्ञानकुमार बम्जन तथा जितबहादुर तामाङलाई त्यसको आधा सजाय माग दाबी गरी प्रतिवादी बनाइएको छ ।

ड्रोनबाट निगरानी

पछिल्लो समय प्रहरीले बम्जनको निगरानी गर्न ड्रोन क्यामरा प्रयोग गरेको छ । आश्रमको चारै कुना उनका सुराकी रहेको र प्रहरी जाँदा सूचना दिएर भाग्ने आशंका गरेको प्रहरीले उनको आश्रम नजिक समय–समयमा ड्रोन क्यामरा पठाउने गरेको छ ।

सिन्धुली प्रहरीका अनुसार, उनी सिन्धुलीको आश्रम आउन छाडेका छन् ।  “हामी जाँदा उनी भागेर नभेटिएका हुन् कि भनी हामीले गोप्य रुपमा ड्रोनबाट निगरानी गर्नेदेखि अन्य अनुसन्धानका विधि पनि अपनाएका छौं । तर, उनी त्यहाँ देखिएका छैनन्,” सिन्धुलीका एक अधिकारीले भने । 

पछिल्लो समय सीआईबीले समेत गोप्य रुपमा टोली खटाएको छ ।