काठमाडौं । एएफसी कपअन्तर्गत अस्ट्रेलियाको माकार्थर एफसी र म्यानमारको सान युनाइटेडबीचको खेल ‘तटस्थ’ भूमिमा सरेको छ । म्यानमारको सान युनाइटेडलाई अस्ट्रेलियन सरकारले भिसा दिन अस्वीकार गरेपछि सिड्नीमा हुने तय भएको खेल थाइल्यान्डको बैंककमा सारिएको हो ।

अस्ट्रेलियाको फुटबल संघले सोमबार सरकारले भिसा दिन अस्वीकार गरेपछि खेललाई ‘तटस्थ’ भूमिमा सारिएको जनाएको हो । अब यी दुई टिमबीचको खेल बिहीबार बैंककस्थित बीजी रंगशालामा हुनेछ ।

अस्ट्रेलियाको ‘ए’ लिग क्लब माकार्थरले गत सेप्टेम्बरमा सानसँग म्यानमारमा खेलेपछि मानव अधिकारवादी समूहबाट चर्को आलोचना खेप्नु परेको थियो । 

“अस्ट्रेलियन सरकारले सान युनाइटेड एफसीका खेलाडी र अफिसियलहरूलाई भिसा दिन अस्वीकार गरेपछि खेल तटस्थ भूमिमा सार्ने निर्णय गरिएको हो । यसको अर्थ सान युनाइटेडले अस्ट्रेलियन भूमिमा खेल्ने कुनै पनि आधिकारिक बाटो छैन,” अस्ट्रेलियन फुटबल संघले जारी गरेको विज्ञप्तिमा उल्लेख छ ।

सन् २०२१ मा निर्वाचित सरकारलाई अपदस्थ गर्दै सत्ता हातमा लिएपछि म्यानमारमा रक्तपातपूर्ण हिंसा जारी छ । जसका कारण त्यहाँका रोहिग्या मुस्लिम समुदायका करिब १० लाख मानिस बंगलादेशमा आप्रवासी बनेका छन् ।