काठमाडौं । आम जनता पार्टी (आजपा)का अध्यक्ष एवं पूर्वमन्त्री प्रभु साहले वर्तमान गठबन्धन सरकार विघटन गरिनुपर्ने बताएका छन् । मुलुकलाई संकटबाट निकास दिन अन्तरिम सरकार बनाएर अघि बढ्नु नै सही निर्णय हुने उनको भनाइ छ ।

सोमबार काठमाडौंमा आयोजित पार्टी स्थायी समितिको बैठकमा उनले सरकारले बिचौलिया र दलालको हिस्साका रूपमा काम गरिरहेको आरोप लगाए । यस्तो सरकार विघटन गर्नुपर्नेमा उनले जोड दिए ।

उनले मुलुकमा विद्यमान राजनीतिक अराजकतालाई अन्त्य गर्न राष्ट्रपतीय प्रणालीमा जानुपर्ने प्रस्ताव समेत गरे ।

“...हामीले भनेका छौँ– देशको निकासको सही निर्णय भनेकै यो सरकारको विघटन, यो व्यवस्थाको विकल्पमा अन्तरिम सरकार बनाएर अघि बढ्ने हामीले भनेका छौँ,” उनले भने, “राष्ट्रपतीय प्रणालीमा जानुपर्छ । अनि मात्रै देशमा स्थिरता प्रदान हुन्छ । अनैतिकताको राजनीतिलाई अन्त्य गर्नुपर्छ ।”

सरकारले मिटरब्याजीका नाममा भ्रष्टाचार र घुसखोरीलाई बढावा दिएको भन्दै उनले त्यसविरुद्ध आफ्नो पार्टीले आन्दोलन गर्ने चेतावनी दिए ।

अध्यक्ष साहले राजनीतिक दलहरूले जनमतको अपमान गरेको टिप्पणी गरे । उनले आफ्नो पार्टीले जनमत फिर्ता अभियानलाई अघि बढाउने घोषणा समेत गरे ।