काठमाडौं । गत अगस्टमा चन्द्रयान–३ को ल्यान्डर र रोभर चन्द्रमाको दक्षिणी ध्रुव नजिकै अवतरण भएको थियो ।

यससँगै चन्द्रमामा आफ्नो यान अवतरण गर्नसक्ने भारत चौथो देश बनेको थियो । दक्षिणी ध्रुवमा पुग्ने पहिलो देश पनि भारत बनेको थियो ।

भारतको यसै चन्द्र मिसनका लागि विद्युतीय उपकरण निर्माता कम्पनी केनेस टेक्नोलोजी इन्डिया हो ।

यसको मुख्यालय प्रविधिको हब मानिने बैंगलोर नजिकैको मैसुर सहरमा रहेको छ ।

केनेस टेक्नोलोजीले चन्द्रयान–३ को रोभर र ल्यान्डर दुवैमा प्रयोग हुने उपकरण निर्माण गरेको थियो । 

सन् २०२२ को नोभेम्बरमा यो कम्पनीले बम्बे स्टक एक्सचेन्जमा 'डेब्यू' गरेको थियो । चन्द्र मिसनका लागि यसले उपकरण आपूर्ति गरेको विषय बाहिरिएसँगै कम्पनीको सेयर तीन गुणा बढेको छ ।

अहिले कम्पनीका संस्थापक एवं प्रबन्ध निर्देशक ६० वर्षीय रमेश कुन्हिकान्नन अर्बपति बनेका छन् ।

केनेस टेक्नोलोजीमा ६४ प्रतिशत सेयर रहेको कुन्हिकान्ननको कुल सम्पत्ति १.१ अर्ब अमेरिकी डलर नाघेको फोब्र्सले उल्लेख गरेको छ ।

कुन्हिकान्ननले मैसुरको नेसनल इन्जिनियरिङ् इन्स्टिच्युटबाट स्नातक गरेका थिए । सन् १९८८ विद्युतीय उपकरणको उत्पादनका लागि उनले केनेस टेक्नोलोजिको स्थापना गरेका थिए ।

कम्पनीले प्रिन्टेड सर्किट बोर्डदेखि अटोमोटिभ, एयरोस्पेस, चिकित्सा र रक्षा क्षेत्रका लागि इलेक्ट्रोनिक उपकरणहरू बनाउने गरेको छ ।