काठमाडौं । नेकपा (एमाले)का अध्यक्ष केपी शर्मा ओलीले मेडिकल व्यवसायी दुर्गा प्रसाईंलाई राजतन्त्रले के–के गर्यो भन्ने कुरा कहाँबाट आउँछ भन्दै प्रश्न गरेका छन् ।
शुक्रबार युवा संघको केन्द्रीय समिति बैठकमा सम्बोधन गर्दै प्रसाईंको नामै नलिइ उनीमाथि आक्रोश पोखे ।
“जनतालाई पढाउनुपर्छ भन्थे ? अन्धकारमा राख्नुपर्छ भन्थे । कानुन थिएन । मैले जे भन्यो त्यही मान्नुपर्छ भन्थे । राजतन्त्रले के–के न गर्यो भन्ने कुरा कहाँबाट आउँछ,” उनले प्रश्न गरे ।
उनले जनताले १५ वर्षअघि फालेको हेर्दा हेर्दा वाक्क भएर फाल्न नसकिने रहेछ भनेर फालेको राजतन्त्र नफर्किने बताए । एउटा मान्छेको छोरो जन्मिदै राष्ट्र प्रमुख हुने र अरुको छोराछोरीले मरिमेटेर पनि बन्न नपाउने अन्यायपूर्ण व्यवस्था चेतना नभएकाले मात्रै मान्ने बताए ।
उनले देशमा राजतन्त्र काम लाग्दैन भनेर जनताले फालेको बताए । राजतन्त्रमा विकास नै हुन नसकेको बताए । राजा भएर बस्नेले दुनियाँलाई दुख दिएको उनको भनाइ छ । प्रसाईंलाई विकाउ मालको संज्ञा समेत दिए ।
“कुनै धतंगाले बोलेको मैले सुने– यो देश अर्को देशसँग मिसाइदियो भने सस्तोमा साइकल पाइन्छ । साग पाइन्छ के पाइन्छ भन्छ,” ओलीले भने, “एकछाक भातमा सिंगो भविष्य बेच्न तयार हुन्छन् कतिपय तत्त्व । कतिपय विकाउ माल हुन्छन् । त्यस्ताको अभिव्यक्तिसँग देशको सार्वभौमसत्ताको कुरा गर्छन् ।”
-1706524096.JPG)
