नयाँ दिल्ली । भारतमा करिब दुई सातादेखि भत्किएको सडक सुरुङमा फसेका ४१ कामदारलाई छुट्ट्याएर अन्तिमसम्म भग्नावशेष खनेपछि एम्बुलेन्सहरूलाई बिहानैदेखि तयारी अवस्थामा राखिएको छ ।

घटनास्थलमा एएफपीका पत्रकारले बिहानको समयमा आपत्कालीन सवारीहरू तयारी अवस्थामा राखिएको देखेको बताएका छन् । हिमाली राज्य उत्तराखण्डको सुरुङबाट उनीहरूलाई चाँडै मुक्त गरिने आशा अधिकारीहरूले व्यक्त गरेका छन् ।

नोभेम्बर २२ मा निर्माणाधीन सुरुङको एक भाग खसेपछि इन्जिनियरहरूले करिब ५७ मिटर माटो, कंक्रिट र भग्नावशेषबाट स्टिलको पाइप खन्ने काम गरिरहेका छन् ।

कैयौँ दिनको दर्दनाक सुस्त प्रगतिपछि शक्तिशाली ड्रिलिङ मेसिनका साथ इन्जिनियरहरू बुधबार द्रुत गतिमा अगाडि बढेका छन् । यद्यपि, धातुका रडहरूका कारण मार्ग अवरुद्ध हुँदा केवल १२ मिटर अगाडि बढ्ने काम सुस्त भएको छ ।

इन्जिनियरहरू रड काट्नका निम्ति पाइपभित्र पस्ने र सो समयमा शक्तिशाली ड्रिलिङ गरिने उद्धार टोलीका वरिष्ठ सदस्य हरपाल सिंहले बताए ।

चिन्तित आफन्त हिन्दु मन्दिर बनाइएको स्थलमा जम्मा भएका छन् । एक पुजारीले सुरुङभित्र फसेका कामदारको सुरक्षित उद्धारका निम्ति प्रार्थना गरिरहेका छन् ।

“जुन दिन उनीहरू सुरुङबाट बाहिर आउँछन्, त्यो दिन हाम्रा निम्ति सबैभन्दा खुसीको दिन हुनेछ,” ३५ वर्षीय चञ्चल सिंह विष्टले भने । सुरुङभित्र उनका २४ वर्षीय भाइ पुष्कर सिंह आर्य फसेका छन् ।

उत्तराखण्डका मुख्यमन्त्री पुष्कर सिंह धामीले बुधबार साँझ दुर्घटनास्थलमा पुगेर काम युद्धस्तरमा भएको बताए ।

भग्नावशेष खस्नुका साथै महत्त्वपूर्ण भारी मेसिन बारम्बार बिग्रिएर उद्धार कार्यमा अवरोध भएको छ ।

मंगलबार पहिलोपटक कामदारलाई जीवित देखिएको थियो । उद्धारकर्मीले एउटा पातलो पाइपको माध्यमबाट पठाएको एन्डोस्कोपिक क्यामेराको लेन्सलाई उनीहरूले हेरिरहेको देखिएको थियो । सोही पाइपमार्फत उनीहरूलाई हावा, खाना, पानी र बिजुली पुर्‍याइएको छ ।

उक्त सुरुङमार्ग प्रधानमन्त्री नरेन्द्र मोदीको सडक परियोजनाको एउटा भाग हो । उक्त परियोजनाको उद्देश्य केही प्रसिद्ध तीर्थस्थल र चीनसँग सीमा जोडिएका क्षेत्रबीचको यात्रा अवस्थामा सुधार गर्नु रहेको छ । यद्यपि, विज्ञले ठूलो भाग पहिरोको जोखिममा रहेको भन्दै उत्तराखण्डमा व्यापक निर्माणको प्रभावका बारेमा चेतावनी दिएका छन् । रासस/एएफपी