काठमडौं । काठमाडौंको माइतीघर आसपासका क्षेत्रमा निषेधाज्ञाविरुद्धको रिट ‘हेर्न नभ्याइने’मा परेको छ । बुधबार सर्वोच्च अदालतका न्यायाधीश नहकुल सुवेदीको इजलासको १६औँ नम्बरमा उक्त रिट परेको थियो ।

सुवेदी न्यायाधीश प्रकाशकुमार ढुंगानासँग संयुक्त इजलासमा समेत रहेका थिए । उनले एकल इजलासमा एउटा बन्दीप्रत्यक्षीकरण रिट मात्र हेर्न भ्याए । यस दिन उनको एकल इजलासमा १८ मुद्दा परेका थिए । बाँकी १७ मुद्दा हेर्न नभ्याइनेमा परेका हुन् ।

निषेधाज्ञाविरुद्धको रिटमा अर्को तारिख सार्वजनिक गरिएको छैन ।

जिल्ला प्रशासन कार्यालय काठमाडौंले यो मंसिर महिनाभर माइतीघर आसपाको क्षेत्रमा सभा, जुलुस गर्न नपाउने गरी निषेधाज्ञा आदेश जारी गरेको थियो । उक्त आदेशविरुद्ध अधिवक्ताहरू भद्रप्रसाद नेपाल र प्रेमप्रसाद सिलवालले मंगलबार रिट दायर गरेका हुन् ।

सर्वोच्चले यसअघि तत्कालीन गृहमन्त्री रामबहादुर थापाले जारी गरेको निषेधाज्ञाविरुद्ध वरिष्ठ अधिवक्ता दिनेश त्रिपाठीसहितको रिटमा सरकारको निर्णय खारेज हुने गरी प्रतिशोधको आदेश जारी गरेको थियो ।

शान्तिपूर्ण विरोधका निम्ति सरकारले ठाउँ तोकिदिन नमिल्ने त्यति बेलाको सर्वोच्चको फैसलामा उल्लेख छ । शान्तिपूर्ण प्रदर्शन र विरोधका निम्ति कुनै पनि ठाउँ निषेधित नहुने सर्वोच्चको फैसला छ ।

मंसिर ७ गते (भोलि) मेडिकल व्यवसायी दुर्गा प्रसाईं र नेकपा (एमाले)को युवा संगठन राष्ट्रिय युवा संघले एकसाथ आन्दोलनका कार्यक्रम आयोजना गरेपछि प्रशासनले निषेधाज्ञा आदेश जारी गरेको हो ।